Fqinjët gjerman bëhen bashkë për të kundërshtuar dëbimin e familjes kosovare

Familja Gashi duhet të largohet nga Lauterbachu i Gjermanisë, edhe pse ka qenë shumë mirë e integruar. Para tre vitesh, çifti shqiptar Adriana dhe Shpejtim Gashi, atëbotë me dy fëmijë, kishin ardhur nga Kosova në Gjermani.

Vajza më e madhe është vetëm tetëvjeçare dhe vijon mësimin në klasën e dytë të shkollës fillore, e mesmja gjashtëvjeçare dhe shkon në kopshtin e fëmijëve.

Atyre iu është shoqëruar edhe vajza e tretë, e cila ka lindur në Gjermani dhe është dyvjeçare.

Prindërit e flasin rrjedhshëm gjuhën gjermane, ndërsa fëmijët flasin në dialektin lokal (shwäbisch) në nivel të gjuhës amtare. Tani e disa vite, Shpejtim Gashi është duke punuar tek sipërmarrja “Lehmbau Glück”.

Tani e një kohë të gjatë, familja po jeton nën kërcënimet për dëbim që janë krahasuar si shpata e Demokleut. Tani ka ardhur edhe letra: Familja Gashi duhet të largohet nga territori gjerman, bile që të shtunën.

Se ata këtu ndjehen si vendas, se kanë gjetur punë e miq, se janë duke jetuar në një banesë në Lauterbach, se një kohë të gjatë nuk janë duke shfrytëzuar ndihma sociale, të gjitha këto nuk janë duke i ndihmuar familjes në procedurën e azilit.

Edhe një herë ata ishin gjendur para dëbimit. “Atëbotë e shkrova një letër se kisha urgjentisht nevojë për zotëri Gashin, pasi mjeshtër të mirë për ngjyrosje nuk mund të gjenden lehtë”, e përkujton rastin pronari gjerman i sipërmarrjes Thomas Glück, shkruan “Schwarzwaelder-Bote”.

Për sipërmarrjen e tij, rrethanat nuk kanë ndryshuar shumë, situata me mungesën e personelit mbetet edhe më tej e paqartë. Por, kësaj radhe, ky shkak nuk ka ndihmuar në vendimin e autoriteteve gjermane për të huajt. Edhe Adriana Gashi kishte dëshirë të startojë në jetën profesionale, por për shkak të perspektivës së dëbimit, nuk është pajisur me leje punë nga autoritetet përkatëse.

“Përse vallë pikërisht familja Gashi?”, e pyesin vetveten banorët e Lauterbachut. “Ata janë aq mirë të integruar, sa që nuk mund të vërehen aspak se kanë qenë refugjatë”. Por, tani është vonë për gjithçka, pasi sipas vendimit nuk ka më hapësirë juridike për t`i ndryshuar gjerat.

Edhe përkundër kësaj, banorët janë të njëanshëm për të ndihmuar dhe urgjentisht janë duke organizuar aksion humanitar.

“Kushdo që dëshiron të dhurojë diçka për familjen Gashi, mund ta dorëzojë në ndonjë zarf në sekretariatin e shkollës në Lauterbach apo tek Thesi Buchholz në kopshtin e fëmijëve, si dhe në llogarinë e shoqatës `Willkommen’”, ka spjeguar udhëheqësja e kësaj iniciative, Sonja Rajsp. “Më pas të hollat do t`i dërgohen familjes Gashi në Kosovë”.