Mbi 600 persona u pickuan nga rriqrat në Malishevë

Vera sjell në shumë lokacione edhe rriqrat që në disa raste paraqesin rrezik për jetën e njeriut.  Pickimi i rriqrave vazhdon të mbetët një nga shqetësimet më të mëdha gjatë sezonit veror.

Që nga muaji shkurt deri me tani në Institutin Kombëtar të Shëndetit publik, janë paraqitur  633 raste të pickimit të rriqrave.

Ndër komunat që konsiderohen të rrezikuara nga rriqrat janë komuna e Rahovecit, Suharekës, Malishevës, Pejës dhe e Prizrenit.

Por Malisheva është më e prekura, pasi si pasojë e prekjes nga ethet hemorragjike, të shkaktuara nga pickimi i rriqrave, kanë vdekur 12 persona.

Dihet se pickimi nga këto insekte mund të jetë fatal, prandaj nëse keni ndonjë nga simptomat si: lodhja, temperaturë të lartë, dhimbje koke, të vjella dhe dhimbje të muskujve lajmërohuni tek doktori. Kjo pasi të gjitha këto mund të përfundojnë me meningjit.

Rriqrat fshihen në bar, degë të shkurreve ose qime të kafshëve. Prandaj, vishni pantallona, përdorni sprej kundër insekteve dhe kujdes ku qëndroni, që të mos pickoheni nga ky insekt.

Rriqrave u duhet diku rreth 10 minuta për t’u ngjitur në lëkurë, që pastaj të thithin gjakun, por kjo nuk vërehet pasi ato lëshojnë njëlloj anestetiku përmes pështymës.

Prandaj, nëse zbuloi se jeni pickuar, ngadalë më një pincetë hiqeni rriqrën, pa i lënë ndonjë gjymtyrë dhe duke mos bërë panik drejtohuni tek doktori më i afërt, për të shikuar nëse ka pasur ndonjë ndikim, pra ju ka infektuar, apo jo. /Telegrafi/