Merkel përjashton mundësinë e pjesëmarrjes gjermane në sulmin ushtarak mbi Sirinë

Kancelarja gjermane Angela Merkel tha të enjten se Gjermania nuk do të marrë pjesë në një sulm ndaj Sirisë mbi përdorimin e dyshuar të armëve kimike nga qeveria e Presidentit Bashar al-Assad.

“Gjermania nuk do të marrë pjesë në aksionet ushtarake”, u tha Merkel gazetarëve në Berlin, shkruajnë mediat e huaja, përcjell Telegrafi.

“Por ne mbështesim gjithçka për të dërguar një sinjal se ky përdorim i armëve kimike nuk është i pranueshëm”.

Merkel tha se duhet të merret parasysh një spektër i plotë masash.

Në rastin e Gjermanisë, tha kancelarja, kjo do të nënkuptonte mbështetjen e punës së Këshillit të Sigurimit të Kombeve të Bashkuara dhe të mbikëqyrësit të armëve kimike OPCW.

Reagimi i kancelares Merkel pas deklaratës së Presidentit të SHBA, Donald Trump, i cili paralajmëronte Rusinë të mërkurën që të përgatitej pasi SHBA do të bombardonte bazat ushtarake.

Donald Trump e përdori Twitter-n të mërkurën për të paralajmëruar se një sulm raketash në Siri është i afërt, disa orë pasi Kremlini u zotua për të shuar çdo raketë ndaj regjimit të Asadit si hakmarrje për mizoritë e gazit helmues të javës së kaluar në periferi të Doumës.

Trump ndoqi një postim të dytë Twitter, duke pretenduar se raporti i Amerikës me Moskën nuk ka qenë kurrë më i keq.

“Marrëdhënia jonë me Rusinë është më i keqi tani sesa ka qenë ndonjëherë, dhe kjo përfshin Luftën e Ftohtë”, shkroi në Twitter.

Ndërkohë, pas kërcënimit të Trump ka ardhur edhe reagimi “i butë” nga presidenti rus.

Vladimir Putin ka shprehur shpresën se “mendimi praktik” përfundimisht do të mbizotërojë në botën moderne, e cila është duke u bërë “më kaotike”. /Telegrafi/