Veseli për deportimin e turqve: Përgjegjës janë edhe presidenti e kryeministri

Kryetari i Kuvendit të Kosovës, Kadri Veseli ka folur sot para deputetëve të Kuvendit lidhur me rastin e djeshëm, të arrestimit dhe deportimit të gjashtë shtetasve turq.

Veseli tha se nuk ka qenë aspak i informuar për rastin.  “Nuk kam pasur bash asnjë informatë”, tha Veseli.

Ai tha se është njoftuar nga familjarëve e të arrestuarve, pasi janë mësimdhënës dhe në ato shkolla tha se janë shkolluar shumica e fëmijëve të bartësve të institucioneve, përfshirë edhe fëmijët e tij.

“Fatkeqësia ka qenë që kanë lajmëruar vonë familjarët”, tha Veseli, duke shtuar se kur e ka kuptuar çështja thuajse kishte përfunduar.

Sipas Veselit, edhe nëse të arrestuarit do të ishin terrorist është dashur të shkohet në bazë të procedurave dhe me dinjitet.

“…Çka bëmë tash, i dorëzuam njerëzit… si me i kidnapu…”, tha Veseli.

Kryetari i Kuvendit tha se shkarkimi i ministrit të Brendshëm dhe i drejtorit të AKI-së është e drejtë, por sipas tij kjo nuk është pjesa e fundit e përgjegjësisë.

Ai tha se përgjegjës për këtë janë edhe presidenti dhe kryeministri.

Kreu i Kuvendit të Kosovës tha se rasti i arrestimit dhe deportimit të shtetasve turq nuk do t’i ndihmojë partneritetit me shtetin e Turqisë.

“Ky veprim na e ka ulë kokën shumë”, tha Veseli. /Telegrafi/