Kryesia e Kuvendit pritet të caktojë sot se kur mbahet seanca e demarkacionit

Kryesia e Kuvendit do të takohet sot në ora 17:00 për të caktuar datën e mbajtjes së seancës për demarkacionin.

Kryeministri Ramush Haradinaj sot tha se seanca ku pikë e rendit të ditës është demarkacioni me Malin e Zi do të mbahet të martën që vjen (20 mars).

Ky vendim sipas Haradinajt është marr pas konsultimeve me të gjitha partitë politike në vend.

“Sipas të gjitha gjasave pas konsultave me grupet parlamentare, me partitë politike për të martën në orën 14 do të shkojmë në seancën për demarkacion”, ka thënë Haradinaj.

Kur u pyet nëse i kanë votat që duhen për të kaluar ratifikimi i marrëveshjes Haradinaj beson se të zgjedhurit e popullit do ta përkrahin demarkacionin që nënkupton edhe heqjen e izolimit për qytetarët e Kosovës.

Megjithëse këtë proces e konsideron jo të lehtë Haradinaj tha se këtë po e bën për shkak se nuk mund ta shoh popullin e tij të izoluar, transmeton KP.

Haradinaj nuk tha konkretisht nëse i kanë të gjitha votat duke shtuar se këtë do ta shohin të martën. Ndryshe Kuvendi ka mbajtur deri më tani tri seanca për demarkacionin, por që të gjitha kanë dështuar pasi që nuk u arrit që t’i kenë votat e mjaftueshme për ta votuar atë.

Kundër demarkacionit deri më tani zyrtarisht janë Lista Serbe, deputetë të Lëvizjes Vetëvendosje si dhe deputetët që tashmë kanë formuar Grup të vetin parlamentar.