Ushtarët në Maqedoni braktisin ARM-në për të punuar si sigurim privat (Video)

Pjesëtaret e Armatës së Republikës së Maqedonisë (ARM) nuk po i gëzohen edhe aq shumë rritjes së pagës për 10%. Kushtet e vështira në punë po i bëjnë ata që të heqin dorë nga misioni i mbrojtjes së vendit. Sipas Sindikatës për mbrojtje dhe siguri, vetëm vitin e kaluar rreth 100 ushtarë janë larguar nga ARM-ja.

Kryetari i Sindikatës për Mbrojtje dhe Siguri, Risto Ajov, thotë se një arsye tjetër është edhe oferta e kompanive të huaja të sigurisë, të cilat paguajnë nga 6 mijë deri në 8 mijë dollarë. Ai thotë se ushtarët e kualifikuar po braktisin armatën, ndërsa të rinjtë duhet të trajnohen 3 vjet për të arritur nivelin e tyre. Këto fakte, sipas tij, Ministrinë e Mbrojtjes e rendisin si më të padëshirueshme për punësim.

“Pjesëtarët e ARM-së, duke marrë pjesë në misionet paqësore në Afganistan dhe Irak, kanë treguar aftësi në detyrat luftarake, të cilëve mund t’ju besohet. Andaj, ata janë një target-grup i rëndësishëm për të gjithë ato kompani për siguri që punojnë privat në ato hapësira të krizës. Ushtarët lehtë vendosin ta ndërrojnë punën e sigurtë në ARM, me të ashtuquajturën punë më pak të sigurtë për kompanitë private nën flamurin amerikan ose britanik”, u shpreh për TV21, Risto Ajtov.

Përveç zëvendësimit të të pensionuarve dhe atyre që janë larguar, ministrja e Mbrojtjes, Radmilla Shekerinska, paralajmëron që këtë vit do të pranojnë edhe ushtarë të rinj profesionistë. Ndonëse ajo zotohet për sigurimin e uniformave të reja të ushtarëve, sindikalistët thonë se ende ka ushtarë me uniforma të leckosura dhe çizme të grisura. Shekerinska e pranon se rritja e pagës nuk është e mjaftueshme, por thotë se ministria do të vazhdojë në përmirësimin e kushteve të tyre.

Sipas projektit për transparencë, Ministria e mbrojtjes ka publikuar pagat e funksionarëve nga kryesia dhe gjeneralëve të ARM-së, të cilat janë mbi 1.000 euro. Ministrja Shekerinska ka pagën mujore prej 1.280 euro, zëvendësministri Bekim Maksuti merr pagë prej 1.055 euro, kurse 40 euro më pak se ministrja merr shef i Shtabit Gjeneral, Metodija Veliçkovski.