Donald Trump e fillon turneun aziatik

Presidenti amerikan, Donald Trump, e fillon turneun e tij aziatik në periudhën e përshkallëzimit të tensioneve lidhur me programet atomike dhe të raketave balistike të Koresë Veriore.

Trump sot niset nga Uashingtoni dhe pritet që gjatë turneut 11 ditësh, ta vizitoj Japoninë, Korenë Jugore, Kinën, Vietnamin dhe Filipinet.

Së pari, ai ndalet në Havai, për një vizitë të shkurtër të forcave ushtarake amerikane në Paqësor dhe Perl Harbor, ndërsa pasnesër arrin në Japoni.

Vizita e tij në Japoni, Korenë Jugore dhe Kinë, me gjasë do të dominohet nga bisedimet për programet raketore dhe të armatimit atomik të Koresë Veriore.

Gjatë muajve të fundit, Koreja Veriore i ka testuar disa raketa ndërkontinentale balistike dhe e ka kryer eksplodimin e 6-të atomik.

Kjo ka ndikuar, që presidenti Trump pat tërhequr vërejtjen se do të ketë “zjarr dhe ashpërsi” në përgjigje të lëvizjeve nga Koreja Veriore.

Gjatë vizitës në Vietnam, ai do të jetë pjesëmarrës në samitin e Bashkëpunimit ekonomik Azi – Paqësor, i njohur si APEC.

Meqë në këtë samit pritet edhe pjesëmarrja e presidentit të Rusisë, Vladimir Putin, zëdhënësi i Kremlinit, Dmitry Peskov, sot nuk e ka përjashtuar mundësinë e takimit të dy presidentëve.

“Ne nuk e përjashtojmë mundësinë e takimit të tillë. Me të vërtetë po diskutohet tash. Atëherë kur të gjitha detajet të bëhen të qarta, si rezultat i koordinimit tonë reciprok, ne do të informojmë”, u tha gazetarëve Dmitry Peskov në Moskë. /rel/