Qeveria kthen në Kuvend ligjin për duhanin në Maqedoni

Qeveria edhe më tej nuk ka qëndrim rreth ndryshimeve në ligjin për mbrojtjen nga pirja e duhanit që në Kuvend e dorëzoi një pjesë e deputetëve. Zëdhënësi i qeverisë, Mile Boshnjakovski nuk zbuloi nëse ndonjëri nga ministrat gjatë debatit rreth kërkesës, ka mbështetur apo refuzuar, si dhe kush është shprehur kundër.

Nismëtarët e ndryshimeve konsiderojnë se vendimi aktual i vitit 2008 është shumë kufizues si për duhanpirësit ashtu edhe për hotelierët. Me ndryshimet, në hapësirat publike do të pihet duhan, por vetëm në ato vende që i ka caktuar përgjegjësi dhe kjo hapësirë të mos jetë më e madhe se 30% i kapacitetit të plotë të objektit.

Qeveria ka kërkuar informatë lidhur me fluturimet e subvencionuara, por nuk zbuloi nëse do të vazhdojë ndihma shtetërore për kompanitë me buxhet të ulët.

Që të intensifikohen rekomandimet nga plani 3-6-9, në seancën e djeshme, qeveria u ka rekomanduar të gjitha institucioneve përkatëse që të fillojnë t’i marrin parasysh dhe të veprojnë lidhur me të gjitha vërejtjet e deritanishme të avokatit të popullit.

Avokati i popullit ndër vite kishte vërejtje se qeveria e mëparshme fare nuk i ka marrë parasysh rekomandimet e tij.