Shpallen fituesit e 26 granteve të USAID në Maqedoni

Projekti për pjesëmarrje qytetare i USAID, sot bëri shpalljen e fituesve të 26 granteve me vlerë të përgjithshme prej mbi një milion dollarë amerikan, përcjell Telegrafi Maqedoni. Qëllimi i projektit është të përforcojë lidhjen ndërmjet qytetarëve dhe Qeverisë nëpërmjet mbajtjes së përfshirjes konstruktive dhe pozitive të organizatave qytetare dhe aleancave, si dhe të rinjve në debate për politikat publike, sigurimit të shërbimeve publike dhe zhvillim të shoqërisë.

“Këto grante do t’i përparojnë politikat publike, do ta përmirësojnë cilësinë e shërbimeve publike, do të sjellin procese më të mira në qeverisje dhe do ta rrisin standardin e jetës së njerëzve në Maqedoni”, tha David Atteberry, përfaqësues i USAID-it në Maqedoni.

Projekti për pjesëmarrje qytetare i USAID filloi aktivitetet e saj në gusht të vitit 2016. Bëhet fjalë për nismë pesë vjeçare e cila realizohet nga “East West Management”, institut në partneritet me katër organizata qytetare vendore: Fondacioni për internet dhe shoqëri “Metamorphosis”, Shoqata për nisma demokratike, Fondacioni “Shoqëria e hapur” dhe Këshilli i të rinjve të Maqedonisë./Telegrafi/