Nesër në “BONEVET”, prezantohet tema “Bio Inspired Robots”

Këtë të martë, në qendrën e inovacionit “BONEVET” në Gjakovë, eksperti i inxhinierisë biologjike, Ardian Jusufi do të prezantojë temën “Bio Inspired Robots”.
Jusufi ka përfunduar studimet bachelor në Berkeley University, duke vazhduar pastaj me studimet e post-doktoraturës në Harvard dhe Cambridge University, në drejtimet të lidhura me inxhinierinë biologjike.

Robotët e gjeneratës së re përbëhen nga materiale fleksibile dhe sensorë që i bëjnë ata më të fuqishëm. Duke qenë të ndërtuar nga goma e silikonit dhe materiale kevlar, ata bëhen më të durueshëm nga kemikalet, rrugëtimi në zjarr apo në terrene edhe më të vështira. Përmes këtyre robotëve tentohet të analizohet dhe studiohet jeta e organizmave biologjik, që prapë janë më të durueshëm dhe përshtatshëm se robotët.

Këto dhe shumë tematika tjera mund t’i dëgjoni të martën nga Ardiani – ekspert dhe profesionist i shquar i kësaj fushe.
Hyrja është e hapur për të gjithë, klikoni këtu për të mësuar më shumë rreth këtij aktiviteti. /Telegrafi/