Nusja ballafaqim me vjehrrin në Prokurori – bëhet e ditur se çfarë i hodhi në kos vjehrrës

Elda Tanushi do të përballet në Prokurori me vjehrrin e saj nga Shijaku, Eduart Stafa, pas ngjarjes së rëndë të ndodhur në familje pak ditë më parë.

Akuzat e rënda të nuses për ngacmim seksual nga vjehrri dhe mohimet kategorike të këtij të fundit, pas tentativës për helmim në banesë ndaj vjehrrës, duket se i kanë vënë në dilemë hetuesit.

Këta të fundit kanë marrë në pyetje deri tani veç e veç, vjehrrin dhe nusen, të cilët akuzojnë njëri-tjetrin, duke dhënë versione diametralisht të kundërta në lidhje me rrjedhën e ngjarjeve në familjen e Eduart Stafës.

Për këtë arsye, përcjell Panorama, Prokuroria ka vendosur që t’i përballë në një seancë të vetme Elda Tanushin me vjehrrin e saj në përpjekje për të zbardhur të vërtetën e konfliktit mes tyre.

Pikërisht për shkak të paqartësisë së disa rrethanave të ngjarjes së ndodhur pak ditë më parë në Shijak, prokurori ka kërkuar masën e sigurisë “arrest shtëpie” ndaj nuses që tentoi t’i hidhte ilaç mizash në kos vjehrrit të saj.

DËSHMIA E NUSES

Në seancën e caktimit të masës së sigurisë, Elda Tanushi deklaroi se ia kishte hedhur ilaçin e mizave në kos vjehrrit e të shoqes, pasi ai e ngacmonte vazhdimisht. Në lidhje me ditën e ngjarjes, ajo ka dëshmuar në gjykatë se “unë me vjehrrën hëngrëm drekën dhe pastaj erdhi vjehrri që kërkoi të hante bukë”.

“Unë, për shkak se më ngacmonte gjithë kohës, i hodha në kos pak ilaç mizash. Në këtë kohë vjehrra, e ndjeu erën dhe filloi të debatonte me mua pasi provoi kosin, ku edhe i tregova se kam hedhur ilaç. Ajo mori policinë dhe më arrestuan”, deklaroi 19-vjeçarja Elda Tanushi në sallën e gjyqit.

Nusja ishte e martuar në Shijak, ku bashkëshorti ishte emigrant në Greqi, ndërsa ajo vetë jetonte në banesën e vjehrrës dhe vjehrrit të saj, Eduart Stafa, të cilin e akuzoi së fundi për abuzim e ngacmim seksual ndaj saj.
HETIMI

Incidenti i ndodhur pak ditë më parë në Shijak po hetohet si krim në familje, mirëpo ende Prokuroria nuk ka bërë një kualifikim ligjor përfundimtar për ngjarjen e ndodhur. Pasi bashkëshortja e Eduart Stafës ka lajmëruar policinë, hetuesit kanë sekuestruar në vendin e ngjarjes enën e kosit me ilaçin e mizave që nusja kishte hedhur në të për t`ia dhënë vjehrrit. Kjo enë është dorëzuar në Institutin e Policisë Shkencore, ku Prokuroria ka kërkuar kryerjen e një ekspertize në lidhje me nivelin e lëndës helmuese dhe rrezikshmërinë e saj për të përcaktuar më pas shkallën e pasojave që mund të vinin tek i dëmtuari në rast konsumimi të kosit. Pas mbërritjes së policisë në banesën ku ndodhi ngjarja në Shijak, ka qenë vetë nusja 19-vjeçare që pranoi autorësinë e krimit. Ajo deklaroi para hetuesve se ilaçin e mizave e kishte hedhur në kos me qëllim që t`ia jepte vjehrrit, pasi ai e ngacmonte seksualisht në mënyrë të përsëritur.