Ambasadori amerikan në Prishtinë, Greg Delawie, tha sot se SHBA-të mbeten të përkushtuara për Kosovën si shtet sovran, demokratik dhe të integruar në komunitetin botëror, ndërsa tërhoqi vërejtjen se tash nuk ka vend për ngërç dhe se politikanët kosovarë duhet t’i lënë anash interesat e tyre partiake, në mënyrë që të punojnë për të mirën e qytetarëve.
Delawie këto komente i bëri në pritjen e organizuar me rastin e shënimit të përvjetorit të 241-të të shpalljes së pavarësisë së SHBA-ve, në të cilën morën pjesë përfaqësues të institucioneve vendore, partive politike, misioneve ndërkombëtare në Kosovë, si dhe të ftuar të tjerë.
Ambasadori amerikan ka përshëndetur përparimin e arritur në Kosovë, por tërhoqi vërejtjen se kohëve të fundit ka shumë ngecje në vend.
“Nuk ka dyshim se Kosova ka arritur shumë në këto vite, përparimi është i pamohueshëm. Por mendoj se është e qartë se entuziazmi i hershëm është zbehur paksa. Po shohim më shumë ngecje e më pak përparim. Më shumë njerëz shqetësohen më tepër rreth të ardhmes së tyre politike se sa për të ardhmen e vendit të tyre. Qytetarët e Kosovës e shohin këtë po ashtu. Disa e kanë shprehur pakënaqësinë e tyre ‘duke i prishur’ fletëvotimet në zgjedhjet e para disa javëve. Besoj se Kosova sot është në pikë kthimi. Çka do të shohim përderisa shikojmë kah e ardhmja? Më shumë ndryshim pozitiv, apo më shumë ngecje? Gjatë vitit të ardhshëm, a do të përparojë më shumë ky vend, a do të ecë përpara në rrugëtimin drejt integrimit euroatlantik dhe të përmirësimit të jetës së qytetarëve, apo do të qëndrojë në një vend? Mendoj se zgjidhja dhe rezultati i kësaj zgjidhjeje do të përcaktohet në masë të madhe nga njerëzit që janë sonte këtu”, ka thënë diplomati amerikan.
Duke folur për historinë e popullit amerikan, Delawie ka përkujtuar se gjërat dukeshin të pashpresa deri në momentin kur Roger Sherman dhe Oliver Ellsworth dolën me një zgjidhje për Dhomën Përfaqësuese dhe Senatin, ide kjo e cila u bë e njohur si “kompromisi i madh”, që paraqet kthimin e parë në historinë e Kushtetutës së SHBA-ve.
“Kompromisi i madh paraqet një mësim të rëndësishëm për udhëheqësit sot, veçanërisht përderisa Kosova fillon ta formojë qeverinë e vet të re. Levat ndërkombëtare që kanë mbështetur vendimmarrjen në të kaluarën në Kosovë nuk janë aq aktive si dikur. Bota është e shpërqendruar, shumë vende janë të preokupuara me çështjet e brendshme. Sytë e të gjithëve nuk janë të kthyer nga Ballkani tash. Gjithnjë e më shumë po llogarisim në juve për t’i marrë vetë vendimet e juaja dhe për të marrë përgjegjësinë për to”, ka thënë Delawie.
Duke përkujtuar se në të kaluarën Kosova ka tërhequr vëmendjen e botës për arsye negative, diplomati amerikan porositi se Kosova sot duhet ta rikthejë vëmendjen e botës në kuptimin pozitiv duke demonstruar se jeton në përputhje me vlerat euroatlantike dhe se udhëheqësit kosovarë duhet ta demonstrojnë këtë dhe t’i bindin bashkëqytetarët e tyre për t’i mbështetur.
Ai ka porositur udhëheqësit e institucioneve dhe partive politike që të punojnë për interesat e Kosovës, duke lënë anash interesat e tyre personale, pasi tash nuk ka kohë për ngërç.
“Në këtë pikë kthimi nuk kemi kohë më për ngërç, është koha për përparim. Këtë e duan qytetarët e Kosovës dhe këtë e meritojnë. Përderisa kremtojmë përvjetorin e 241-të të Ditës së Pavarësisë së bashku, shpresoj se të gjithë mund të pajtohemi- prej qeverisë e deri tek opozita dhe prej bujkut e deri te shërbyesi civilë – se Kosova nuk mund t’ia lejojë vetes të shpenzojë më shumë kohë apo energji duke qëndruar në një vend. Ajo duhet t’i kthehet vendosmërisë të së ardhmes dhe ta ngazëllejë botën me përparimin e saj. Duhet të vë sistem të sundimit të ligjit që garanton mbrojtje të barabartë dhe llogaridhënie të barabartë për të gjithë. Ajo tashmë e ka demonstruar se mund të mbajë zgjedhje sipas mënyrës perëndimore, tani duhet të demonstrojë se mund të qeveriset në të njëjtën mënyrë”, ka thënë Delawie.
Ai ka thënë se SHBA-të mbeten të përkushtuara për Kosovën si shtet sovran, demokratik dhe i integruar në komunitetin botëror.
“Kam shpresë se do të shohim udhëheqësit-qeveritarë e opozitarë- që e demonstrojnë përkushtimin e njëjtë. Udhëheqës që demonstrojnë vlerën e kompromisit për hatër të zgjidhjes, si dhe vlerën e bashkëpunimit për hatër të përparimit të përbashkët, për ta krijuar të ardhmen e Kosovës si demokraci e rëndomtë evropiane”, ka thënë diplomati amerikan.
Ndryshe, më 4 korrik të vitit 1776, delegatët e 13 kolonive britanike të Amerikës nënshkruan Deklaratën e Pavarësisë, e cila thuhet se ishte shkak i Revolucionit Amerikan. Ky dokument u hartua kryesisht nga 32-vjeçari Tomas Xheferson.
Njëra pjesë e Deklaratës përmbante një listë ankesash kundër mbretit Xhorxhi i Tretë dhe Parlamentit të Anglisë. Pjesa tjetër e Deklaratës, përmbante thelbin e idesë mbi lirinë amerikane, mbi të drejtat e natyrshme që kanë njerëzit.
“Ne besojmë se këto të drejta janë të natyrshme, se të gjithë njerëzit janë krijuar të barabartë, se krijuesi u ka dhënë atyre disa të drejta të patjetërsueshme, si jeta, liria dhe kërkimi i lumturisë. Ne besojmë se për të siguruar këto të drejta njerëzit krijojnë qeveri, të cilat i marrin fuqitë e tyre me pëlqimin e të qeverisurve, se sa herë që një formë qeverisjeje i minon këto qëllime, është e drejta e popullit ta ndryshojë, apo ta heqë atë”.
Deklarata e Pavarësisë shihet si një nga dokumentet më të rëndësishme në historinë e Shteteve të Bashkuara. Dokumenti tjetër është Kushtetuta. Në Shtetet e Bashkuara 4 Korriku festohet çdo vit si ditë kombëtare – Dita e Pavarësisë./kp/
Promo
Reklamo këtuLufta Prigozhin - Putin
Më shumëNisin lëvizjet e para për njohjen e gjuhës shqipe, Google po shton Kosovën në programin e verifikimit të reklamuesve
Raketat “Javelin” pritet të arrijnë në Kosovë shumë shpejt
Digjen dy vetura me targa serbe në veri
Ish-udhëheqësi i inovacionit në Mercedes Benz, Philip Gneiting: Kosova ka rini me ide të mira për startup-e
Dënime drakonike për duhanxhinjtë: 20 mijë euro gjoba për bizneset, 200 euro për personat që pinë duhan në ambiente të mbyllura
Bajrami: Vazhdon korropsion, vetëm të premtën janë publikuar katër kontrata njëburimore në shumë 683 mijë euro
Shitet banesa në Fushë Kosovë në një vendodhje perfekte – 80.5m², çmimi 62,000Euro! ID-254
Ideale për zyre – në qendër të Prishtinës lëshohet banesa me qira ID-253
Krijo hapësirën tënde të biznesit – zyre me qira te 4 Llulat – 300€/muaj ID-252
Ofertë e veçantë – vila në Brezovicë ofrohet me zbritje ID-246
Një jetë e re fillon këtu – banesa e gatshme 2+1 në rrugën ‘Gazmend Zajmi’ ID-251
Pse çdo prind duhet të zgjedhë këpucët apo atletet Reebok në Melodia Px për fëmijët e tyre?!
Eksploro natyrën dhe ngjit majat me çizmet e duhura
Formësoje trupin me peshën Martes
Rehatohu n’plazh mirë dhe lirë
Për çfarë vibes je – Summer Vibes apo Good Vibes?
Më të lexuarat
Mozzik dhe Lotina Haziri në një lidhje dashurie?
Si e ndryshoi historinë amerikane ylli i filmave për të rritur?
Aksion i policisë në Leposaviq, konfiskohen dhjetëra uniforma të policisë serbe
Dënime drakonike për duhanxhinjtë: 20 mijë euro gjoba për bizneset, 200 euro për personat që pinë duhan në ambiente të mbyllura
Donald Trump filloi të thotë gënjeshtra - shumë televizione amerikane ndërprenë transmetimin e konferencës
Sir Alex Ferguson nuk i foli asnjëherë lojtarit që ishte blerja e tij e fundit tek Man United