Mustafa vlerësoi lartë kontributin e Presidentit Nishani

Kryeministri në dorëheqje i Republikës së Kosovës, Isa Mustafa, priti në takim presidentin e Republikës së Shqipërisë, Bujar Nishani.

Gjatë takimit, Mustafa shprehu mirënjohjen e Qeverisë dhe të qytetarëve të Kosovës për kontributin e madh që Presidenti Nishani ka dhënë për Kosovën, gjatë mandatit të tij në krye të shtetit shqiptar.

Duke vlerësuar përkrahjen e madhe të Shqipërisë gjatë kësaj periudhe, Mustafa theksoi rolin e veçantë pozitiv dhe unifikues të presidentit në largim Nishani në proceset zhvillimore në Kosovë, në Shqipëri dhe më gjerë.

Gjatë takimit, Mustafa e njoftoi Nishanin edhe për zhvillimet aktuale në Kosovë, si dhe përkushtimin e tij për avancimin e mëtejshëm të zhvillimit ekonomik, luftimin e krimit të organizuar dhe korrupsionit, integrimet euroatlantike dhe proceset tjera për zhvillimin e shtetit.

Mustafa, po ashtu, theksoi përkushtimin për fuqizimin e mëtejshëm të bashkëpunimit bilateral me Shqipërinë në të gjitha fushat.

“Presidenti Bujar Nishani, falënderoi kryeministrin Mustafa për punën dhe përkushtimin e tij për fuqizimin e shtetit të Kosovës si dhe avancimin e bashkëpunimit me Shqipërinë. Presidenti Nishani foli për proceset aktuale në Kosovë, në Shqipëri dhe më gjerë, duke theksuar besimin e tij për avancimin e proceseve demokratike dhe euroatlantike”, thuhet në njoftimin e kryeministrisë. /Telegrafi/