Macron dhe Le Pen në rrethin e dytë të zgjedhjeve presidenciale në Francë

Kandidati i qendrës Emmanuel Macron dhe udhëheqësja e së djathtës ekstreme Marine Le Pen janë fitues të rrethit të parë të zgjedhjeve presidenciale në Francë.

Ministria e Brendshme e Francës tha se nga 20 milionë votat e numëruara, Marine Le Pen ka marrë 24.38 për qind, Emmanuel Macron 22.19 për qind, François Fillon 19.63 për qind dhe Jean-Luc Melechon 18.09 për qind të votave.

Kjo përfaqëson afro gjysmën e votave por nuk përfshinë kryesoret, shkruan BBC.

Më herët, rezultatet e projektuara, nxorën Macron me 23.7 për qind ndërkohë zonjën Le Pen me 21.7 për qind të votave, ka bërë të ditur Televizioni Francez.

Të dy kandidatët janë sfiduar nga François Fillon i qendrës së djathtë dhe ai i të majtës ekstreme Jean-Luc Mélenchon, thonë projeksionet, transmeton BBC.

Macron dhe Le Pen do të përballen në balotazh më 7 Maj.

Cilido që të fitojë në rrethin tjetër, votimet do të shënojnë një ndryshim nga partitë e majta dhe ato të qendrës së djathtë që kanë dominuar për një kohë të gjatë politikën franceze, thotë BBC.

Pjesëmarrja në zgjedhje në nivel kombëtar duket të jetë e ngjashme me atë të zgjedhjeve të vitit 2012.

Në Paris ndërkaq ka patur përleshje ndërmjet demonstruesve dhe policisë pas njoftimeve se Marine Le Pen ka kaluar në rrethin e dytë të zgjedhjeve presidenciale, dhe policia përdori gazin lotsjellës për të shpërndarë turmën.

Forcat e policisë kanë rrethuar pjesën e qytetit ku ndodhën demonstratat, dhe policia tha se bëhet fjalë për të rinj në mesin e të cilëve ka edhe anarkistë dhe ‘antifashistë’.

Macron tha sonte se do që të bëhet president i patriotëve që përballen me kërcënimin e nacionalistëve.

“Duam të ndërtojmë një Francë të fuqishme në kuadër të BE-së”.

Marine Le Pen ndërkaq tha se bëhet fjalë për “mbijetesën e Francës” duke u bërë thirrje të gjithë ‘patriotëve’ që ta mbështesin si kandidaten e popullit.

Presidenti i Francës, François Hollande, me mbylljen e vendvotimeve dhe pas rezultatit të projektuar, ka biseduar me telefon me Emmanuel Macron për ta uruar për kalimin në rrethin e dytë.

Kandidati i qendrës së djathtë që ka humbur në rrethin e parë, François Fillon, ka shkruar në rrjetin e tij social se e mbështet Macron në rrethin e dytë.

Edhe ish kryeministri francez, Manuel Valls, i Partisë Socialiste thotë se e mbështet Emmanuel Macron në rrethin e dytë.

“Sikurse edhe në rrethin e parë unë do të votojë Macron… për Francën”, ka shkruar në Twitter Valls.

Presidenti i Komisionit Evropian, Jean Claude Juncker e ka përgëzuar Emmanuel Macron për rezultatin në zgjedhje.

Edhe shefja e politikës së jashtme të BE-së, Federica Mogherni, i ka uruar mbështetësit e Macron-it për valëvitjen e flamujve francezë dhe atyre të BE-së.

“Rezultati është një shpresë dhe e ardhmja e gjeneratave tona”, shkroi Mogherini në rrjetin e saj social twitter.

Kryeministri i Belgjikës, Charles Michel në rrjetin e tij social Twitter e ka përgëzuar Emanuel Macron, pasi sondazhet sugjerojnë se kandidati i qendrës, në rrethin e dytë më 7 maj do të garojë së bashku me udhëheqësen e të djathtës ekstreme Marine Le Pen.

Michel tha se ishte ‘optimist’ për rezultatin dhe për “projektin evropian që shikon përpara”.

Ministri i jashtëm i Gjermanisë, Sigmar Gabriel, e ka përshëndetur projeksionin sipas të cilit Macron ka kaluar në rrethin e dytë të votimeve.

“Ka të bëjë me Francën, natyrisht, por gjithashtu ka të bëjë edhe me Evropën”, tha ai.

“Më vjen mirë që Emmanuel Macron ka fituar këtë rreth sepse ai ishte I vetmi kandidat I vërtetë pro Evropian”. /rel/