Kosovari që kishte thënë “Unë jam vrasësi, më arrestoni!”, ka rrëfyer se si ka ardhur deri te vrasja e boshnjakut

Lajmi për kosovarin i cili të dielën ka vrarë një boshnjak në Vjenë dhe është dorëzuar vetë në polici, ka vazhduar të jetë aktual edhe gjatë ditës së sotme.

Siç shkruajnë mediat austriake, personi 26 vjeçar me rastin e marrjes në pyetje ka thënë se nuk ka pasur qëllim ta vriste viktimën.

“Unë kam dashur vetëm ta godisja me revole në kokë por papritmas revolja ka shkrepur”, shkruan orf.at.

Sipas një dëshmitari, dorasi dhe viktima kishin qenë së bashku në kafenenë “Blanco” ku kishin biseduar miqësisht dhe pa probleme. Por vetëm pasi kanë dalë nga lokali, ka shpërthyer zënka mes tyre.

Ai beson se shkak për këtë konflikt ka qenë një femër që kanë njohur të dy.

Sipas tij, ka qenë boshnjaku ai që e ka goditur me shuplakë kosovarin, transmeton albinfo.ch.

Po ashtu ai ia ka drejtuar atij dozën e sprejit por nuk ja ka qëlluar.

Si reaksion, kosovari i cili ka punuar si truproje në një diskotekë e ka goditur me revole por revolja është shkrepur dhe ka ndodhur vrasja.

Sipas avokatit të kosovarit, vetë sjellja e tij pas krimit flet vet në të mirë të klientit të tij.

Pra ai është paraqitur në polici dhe ka pranuar aktin e kryer.

Veç kësaj shenjat e lëndimeve të pësuara në fytyrë tregojnë se ai ka qenë i sulmuar.

Për më tepër, policia ka alarmuar autoambulancën pasi që kosovari ankohej nga dhembjet në kokë, si pasojë e goditjeve me grushte që kishte pësuar.

Sidoqoftë, prokuroria po i zhvillon hetimet për vrasje të rëndë. Lidhur me caktimin e paraburgimit do të vendosë Gjykata e Landit të Vjenës, të mërkurën.