Fermerëve në Malishevë u ndahen 50 lopë qumështore

Dhjetëra fermerëve nga Komuna e Malishevës, u janë ndarë lopë qumështore, përkatësisht me nga 5 krerë lopë. Furnizimi i fermerëve me lopë qumështore, bëhet në kuadër të realizimit të projektit për përkrahjen e blegtorëve, dhe në kuadër të investimeve të përgjithshme në bujqësi.

Këta dhjetë fermer, paraprakisht janë ndihmuar nga komuna, në ndërtimin e stallave, ndërsa finalizimi i kësaj ndihme bëhet me furnizimin me lopë qumështore. Përmes kësaj ndihme, Komuna e Malishevës, synon shtimin e numrit të gjedhëve, rritjen e kapaciteteve për furnizimin e tregut me qumësht dhe produkte të qumështit dhe krijimin e vendeve të punës.

Në shpërndarjen e gjedhëve, mori pjesë edhe nënkryetari i Komunës së Malishevës, Rexhep Mazreku dhe drejtori i Drejtorisë për Bujqësi, Murat Hoxha, të cilët i kanë uruar fermerët përfitues të kësaj përkrahje nga ana e komunës. “Ti gëzoni dhe ta shtoni numrin e krerëve në stallat tuaja”, u tha nënkryetari Mazreku.

Ndërsa drejtori i Drejtorisë së Bujqësisë, Murat Hoxha, ka thënë se “përkrahja për bujqësinë në përgjithësi dhe e blegtorisë në veçanti, do të vazhdoj të mbetet prioritet i Komunës së Malishevës, dhe investim në këtë drejtim do të vazhdojnë edhe gjatë vitit 2017”. Drejtori Hoxha, ka sqaruar se ndarja e lopëve, është bërë sipas numrave, përkatësisht numrave të regjistrit që posedojnë lopët dhe kjo ka qenë forma më transparente e ndarjes së krerëve të lopëve.

Po ashtu drejtori Hoxha, ka thënë se “të gjitha këto krerë, janë të mbarësuara dhe brenda pak kohësh, praktikisht numri i tyre do të dyfishohet nga pesëdhjetë, në njëqind krerë dhe ky është edhe synimi ynë, që përmes kësaj ndihme fermerët të kenë mundësi ti rrisin kapacitetet e tyre në stalla”, tha ai.
Përndryshe, furnizimi me lopë qumështore, është bërë në bashkëfinancim me fermerët, ku Komuna e Malishevës ka kontribuar me 70 për qind të shumës, përkatësisht me 72200 euro, ndërsa fermerët me 30 për qind të shumës.

Gjatë vitit 2017, sipas drejtorit Hoxha, do të ketë edhe investime tjera, si në fushën e blegtorisë, ashtu edhe fushat tjera të bujqësisë. /Telegrafi/