Gazeta ‘Utrinski Vesnik’ në prag të mbylljes?

Stafi në të përditshmen “Utrinski Vesnik” sot nga menaxhimi i kompanisë që boton gazetën “Media Print Macedonia”, ka marrë këtë ultimatim – ose 10 gazetarë të mbeten papunë ose gazeta prej nesër të mbyllet, përcjell Telegrafi Maqedoni.

Arsyeja për këtë ishte gjendja e vështirë financiare në kompani. Këto ditë tre gazetat që i boton MPM, “Dnevnik”, “Vest” dhe “Utrinski vesnik” shtypen në tirazhe më të vogla, dhe arsyeja për këtë është mungesa e letrës për shtypje dhe pakësimi i shpenzimeve.

Këtë mëngjes, kryeredaktorja e “Utrinski Vesnik”, Sonja Maxhovska, ishte e vendosur para një fakti të kryer – rreth 24 orëve të dorëzojë një listë të emrave për largimin e 10 gazetarëve, përndryshe gazeta prej të mërkurën do të pushojë së shtypuri.

Sipas informatave nga MPM, për këto gjëra, janë informuar të gjithë redaktorët dhe kryetarët e sindikatave. Ata u informuan se masat e deritanishme nuk kanë dhënë ndonjë rezultat dhe se llogaritë bankare janë bllokuar.

Për këto zhvillime janë njoftuar edhe Shoqata e Gazetarëve të Maqedonisë dhe Sindikatat e Gazetarëve. /Telegrafi/