Deputetët me lista të hapura, LSI-ja nis betejën në Parlament

Lëvizja Socialiste për Integrim do të propozojë në Komisionin e Reformës Zgjedhore listat e hapura të kandidatëve për deputetë dhe reduktimin e numrit të deputetëve në Kuvendin e Shqipërisë.

Kryetari i Grupit Parlamentar të LSI-së, Petrit Vasili, tha dje se ky propozim do të depozitohet në Komisionin e Reformës në mënyrë institucionale, shkruan “Panorama”.

“Zgjedhësit të jenë gjithnjë e më të ndërgjegjshëm për kë zgjedhin dhe kush do t’i përfaqësojë. Ky është një thelb shumë pozitiv dhe i shëndetshëm, një praktikë që edhe vende të tjera e kanë zbatuar. Ky qëndrim politik është një qëndrim që do ta mbajmë edhe në Komisionin përkatës të Reformës. Jo gjithmonë çdo ide ka rëndësi se kush është pro ose kundër, e rëndësishme është që është një ide pozitive dhe e shëndetshme, dhe a pranohet nga zgjedhësit shqiptarë. Tryeza është një mënyrë e mirë për të diskutuar për këtë çështje dhe për të gjetur dakordësitë përkatëse”, u shpreh dje Vasili në një komunikim me gazetarët.

Ndërkohë lidhur me kundërshtitë, duke përfshirë edhe Kryeministrin Edi Rama, nënkryetari i LSI-së u shpreh se gjithsecili ka opinionet e tij, por nuk do të ulen me kushte në tryezë. Opsioni i LSI-së u lë partive propozimin e kandidatëve për deputetë, por jo renditjen e tyre, për të cilën duhet të vendosë elektorati. “Personalisht jam kundër listave të hapura, por kjo çështje kërkon një diskutim të gjerë. Unë jam që të zbatohen rekomandimet e OSBE-ODHIR”, është shprehur Kryeministri Rama.

Partia Demokratike është shprehur kundër listave të hapura. Sekretari i Përgjithshëm në këtë parti, Arben Ristani, ka thënë dje se listat e hapura na çojnë në ndryshimin e sistemit zgjedhor.

“Ka një diskutim këto ditë rreth votimit me ‘listë të hapur’ apo jo. Së pari, votimi me listë të hapur apo të mbyllur është variant i sistemit proporcional. Së dyti, nëse përkrahësit e votimit me ‘listë të hapur’ kanë parasysh nevojën popullore për të shprehur direkt vullnetin për deputetin e dëshiruar prej tyre dhe kufizimin e vullnetit të kryetarëve të partive, atëherë pse të mos kthehemi te sistemi mazhoritar?”, shkruan Ristani në një status të tij në “Facebook”, duke reaguar në debatin publik për listat e hapura.

Në vijim të qëndrimit të tij, Ristani shprehet se listat e hapura nuk janë një proces teknikisht i lehtë. “Së treti, është domosdoshmëri që votimi të jetë një proces sa më i thjeshtë për votuesin, dhe këtu kam një pyetje për ata që përkrahin sistemin proporcional me listë të hapur. A e dinë dhe e kanë parasysh se si teknikisht realizohet ky lloj votimi?”, pyet Ristani, që tregohet skeptik për listat e hapura. I pari që hodhi idenë e listave të hapura ishte kryetari i LSI-së, Ilir Meta, javën e shkuar, në një seminar të organizuar nga KQZ.

“Unë mendoj që problemi demokratik i Kodit është që listat duhet të jenë të hapura. Kjo e bën të pashmangshme pastaj dhe vetë demokratizimin e partive, sepse krijon lidhjen e qytetarit me votuesin. Pra, deputetët nuk janë thjesht partiakë, por janë më shumë parlamentarë, sepse kanë një raport tjetër me votuesin dhe do të ruajnë një raport edhe me drejtimin e partisë, edhe me qytetarët. Unë këtë gjë e kam mbështetur dhe e mbështes pavarësisht nga vështirësitë që mund të ketë në zbatimin e saj. Sepse në këtë mënyrë, ne më shumë sesa kemi një sistem parlamentar demokratik, kemi një sistem dypartiak, trepartiak apo katërpartiak, kjo nuk është shumë e shëndetshme”, tha Meta. /Telegrafi/