Ministri Bajrami dhe rektorët e universiteteve publike vizitë zyrtare në SHBA

Ministri i Arsimit, Shkencës dhe Teknologjisë, Arsim Bajrami së bashku me Rektorët e Universiteteve Publike të Kosovës,do të qëndrojnë për një vizitë zyrtare studimore disaditëshe në SHBA.

Sipas agjendës, ministri Bajrami dhe Rektorët e Universiteteve Publike, do të marrin pjesë në “Samitin për Kosovën” i cili do të organizohet në Universitetin “James Madison “ dhe në disa universitete tjera si të Harrisonburg, Virgjinias etj. Me këtë rast do të mbahen disa punëtori lidhur me avancimin e Sistemit Arsimor të Kosovës, me theks të veçantë në Arsimin e Lartë.

Në këto punëtori do të diskutohet për Strategjitë per përmirësimin e shërbimeve financiare dhe planifikim strategjik e menaxhim të buxheteve nga ana e universiteteve.

Gjatë qëndrimit në SHBA, ministri Bajrami me bashkëpunëtor në Washington, do të zhvilloi një sërë takimesh me përfaqësues të Bankës Botërore, të USAID-it të cilët me projekte të ndryshme po e ndihmojnë arsimin në Kosovë.

Ministri Bajrami gjithashtu do të ketë një takim edhe në Departamentin e Shtetit ku do të diskutohet për implementimin e skemës së bursave Fullbright, për të cilat kohë më parë është nënshkruar marrëveshje bashkëpunimi nga ana e ministri Bajrami dhe Ambasadorit Amerikan Delawie.