Bajrami: Qytetarët e Kosovës po përballen me probleme të shumta

Deputetja nga ‘Nisma për Kosovën’, Valdete Bajrami tha se mirëqenia e qytetarëve të Kosovës është e rëndë.

Ajo tha se qytetarët po ballafaqohen me probleme në shumë sfera, si në arsim, shëndetësi, bujqësi, siguri etj.

“Vitin e kaluar ju e filluat largimin e mijëra të rinjve nga vendi, dhe keni thënë që po ikin me Iphone. Ky vit del të jetë tragjik pasi kjo qeveri në vend që t’ju krijonte kushte më të mira, ju nuk e bëtë atë. Jeni përgjegjës për të ardhmen e shoqërisë sonë. Në secilin takim me ndërkombëtare ju i përmendi rininë tonë si aset, e që ju shërben juve. E keqpërdorni rininë edhe për rregullimin e imazhit tuaj personal”, tha Bajrami.

Deputetja Bajrami foli po ashtu edhe për rastet e fundit të vrasjeve, të cilat sipas saj janë shumë alarmante.

“Si mund të pranohet ky realitet ku pjesëtarët e policisë vijnë deri në atë pikë që bëjnë edhe vetëvrasje. Vetëm dy muaj më parë jemi karakterizuar me numrin e vrasjeve të rinjve. Vetëm në muajin gusht janë vrarë nëntë të rinj. Pastaj, brenda ditës pati tre të shtëna në Prishtinë. A nuk do duhej që të gjitha institucionet të alarmoheshin? Për këtë situatë duhet të jap dikush përgjegjësi. Ju së bashku me të gjithë kolegët tuaj jeni përgjegjës pasi që keni dështuar të ofroni mirëqenie, siguri, shëndetësi, vende të lira të punës, drejtësi etj. Vetëm pas këtyre ngjarjeve që po ndodhin ju duhet të jepni dorëheqje. Rinia është e ardhmja e këtij vendi e jo ju”, përfundoi Valdete Bajrami. /Telegrafi/