Mos kërko në rrugë, kërko në Gjirafa.biz (Video)

Kompania e suksesshme kosovare Gjirafa.com do të lansojë produktin inovativ online, GjirafaPikBiz, e cila është faqja e vetme shqiptare ku gjenden mbi 30 mijë biznese dhe pika të interesit të Kosovës.

Po ashtu do të ketë edhe hartën e Kosovës me pamje 360 shkallë, navigacion për të gjitha rrugët me pamje 360 shkallë, gati secilës rrugë në Kosovë (Streetview).

Po ashtu, sipas drejtuesve të Gjirafa.com, produkti i ri GjirafaPikBiz, njeh edhe gjuhën zhargon apo sleng në kërkim, shembull fjalë që përdorim në jetë të përditshme, por të cilat mund të mos jenë medoemos në gjuhen shqipe.

Mërgim Cahani, drejtor i Përgjithshëm në kompaninë Gjirafa, gjatë një bisede për Telegrafin ka shpjeguar më shumë për produktin më të ri të kompanisë, të cilën e drejton.

Sipas tij, për të lansuar produktin GjirafaPikBiz, është dashur angazhim, shumë punë e mund disa mujor nëpër terren, në mënyrë që produkti të jetë sa më i plotësuar.

Cahani ka thënë se do të ketë risi të shumta ky projekt, po më kryesorja është numri i madh i bizneseve, duke filluar nga një byrektore e deri te hotelet me pesë yje.

“GjirafaPikBiz, do të ketë risi të shumta, por kryesoret janë se aty do të jenë më shumë se 30 mijë biznese, të gjithë bankomatët e bankave, auto larjet, parkingjet, komunat, monumentet fetare dhe kulturore. Menjë fjalë do të jetë online çdo pikë interesi”, tregon për Telegrafin, drejtori i Përgjithshëm i Gjirafa.com, Mërgim Cahani.

Sipas tij, GjirafaPikBiz, ka edhe risi sa i përket kërkimeve me produkte, por duke mos anashkaluar edhe kërkimet me emër të kompanive.

“Përveç hartave me 360 shkallë si dhe navigacionit, e ka mundësinë e kërkimit edhe me produkte, por duke mos anashkaluar edhe kompanitë. Shembull nëse jeni në një zonë edhe nuk di emër të kompanive, por do të hash një sandviç atëherë me kërkimin me ketë produkte do të dalin dyqanet të cilat shërbejnë sandviç”, ka thënë Cahani.

Sipas tij, Gjirafa.com është duke punuar që GjirafaPikBiz, të lëshohet edhe për territorin e Shqipërisë dhe të Maqedonisë. /Telegrafi/