Pas grabitjes, nën hetimet zyrtarët e sigurisë në aeroport

Prokurori i Përgjithshëm, Adriatik Llalla, ka urdhëruar nisjen e hetimeve për drejtues dhe zyrtarë të Policisë, të cilët janë përgjegjës për zbatimin e masave të shtuara të sigurisë në aeroportin e Rinasit, pas atentateve terroriste në Stamboll.

Kjo pasi masat e sigurisë në Rinas rezultuan joefikase. Kjo u dëshmua gjate grabitjes së një sasie të konsiderueshme parash në pistën e fluturimeve gjatë ditës së djeshme.

Prokurori i Përgjithshëm ka angazhuar drejtues të Prokurorisë së Përgjithshme për kryerjen e veprimeve te nevojshme hetimore në këtë drejtim.

Të enjten, tre persona të maskuar dhe të armatosur prenë menteshat e portës të jashtme që ndodhet në krahun e rrugës Rinas- Fushë Krujë dhe hynë në rrethimin e brendshëm në aeroport.

Pasi hynë në makinë në pistën e avionëve në aeroport, grabitësit i janë drejtuar me një armë kallashnikov drejtuesit të mjetit që transportonte një sasi të konsiderueshme prej miliona eurosh.

Nën kërcënimin e armëve kanë grabitur 10 milionë në valutë. /Telegrafi/