Në hall nga kundërmimi i ujërave të zeza në kanalin “Ibër-Lepenc” (Video)

Banorët që jetojnë në afërsi të kanalit “Ibër-Lepenc” në rrugën “Qemal Stafa” në kryeqytet, që nga vjeshta po përballen me erën e rëndë që kundërmon në këtë pjesë, si pasojë e derdhjes së ujërave të zeza në këtë kanal.

Ata thonë se kjo ka ardhur për shkak të dëmtimit të një gypi gjatë punimeve nga ujësjellësi, raporton “038”i KTV-së.

Zakonisht, vera sjell temperatura të larta, të cilat pëlqehen shumë nga njerëzit.

Por, ndryshe nga herët e kaluara, banorëve që jetojnë përreth kanalit “Ibër-Lepenc” në rrugën “Qemal Stafa” në periferi të kryeqytetit, i nxehti ua solli erën e pakëndshme që kundërmon nga ky kanal.

Kjo si pasojë e dëmtimit të një gypi të kanalizimit gjatë punimeve nga kompania e kontraktuar nga ujësjellësi në këtë pjesë të rrugës.

Madje, sipas banorëve, thyerja e gypit gjatë punimeve ka lënë peng edhe funksionalizimin e një pjese të kanalizimit të ri.

Ndërsa, në Ndërmarrjen Hidroekonomike “Ibër Lepenc”, përmes emalit, kanë njoftuar se janë në dijeni të problemit dhe se kanë lajmëruar edhe Inspektoratin Komunal dhe Ministrinë e Mjedisit dhe Planifikimit Hapësinor.

Ata shpresojnë se ky problem të zgjidhet shpejtë, në mënyrë që ecuria e punëve të ndërmarrjes të shkojë si duhet dhe të krijohen kushte të përshtatshme për jetesë për banorët e asaj anë.

Ndërkohë, në Kompaninë Ujësjellësi Rajonal “Prishtina”, thonë se gypi është dëmtuar gjatë punimeve për instalimin e rrjetit që lidh lagjen Arbëria me fabrikën e Ujit në Shkabaj.

Por, edhe dy ditë pas kësaj deklarate, nuk është parë asnjë shenjë punimesh të reja dhe gjendja në kanal ishte e njëjtë.