Vendimet: Haki Çako kthehet në punë, Elvis Rroshi në shtëpi

Priteshin dy vendime të rëndësishme këtë të enjte nga dy gjykata në Tiranë.

Në rastin e parë do të vendosej për Haki Çakon, drejtorin e pezulluar të Policisë së Shtetit, dhe në rastin e dytë për Elvis Rroshin, kryebashkiakun e arrestuar të Kavajës.

Në të dy rastet, vendimi pritej me shumë interes nga politika në vend.

Opozita ishte ankuar se qeveria po u bën presion gjykatave për të marrë vendime në favor të eksponentëve të saj.

Dhe qeveria nga ana e saj nuk u kursye në sulmet ndaj gjyqësorit.

Duket se kjo ka qenë një e enjte e mirë për mazhorancën.

Gjykata e Apelit në Tiranë ka rrëzuar vendimin e marrë nga Gjykata e Shkallës së Parë në lidhje me Drejtorin e Përgjithshëm të Policisë së Shtetit, Haki Çako.

Gjykata ka vendosur të kthejë në detyrë Haki Çakon, i pezulluar pas një kërkese të Prokurorisë në lidhje me hetimet për pajisjen e përgjimit.

Ndërkohë Gjykata e Tiranës ka vendosur të lërë në arrest shtëpie kryebashkiakun e Kavajës, Elvis Rroshi, i akuzuar se ka mashtruar me formularin e dekriminalizimit.