Hamza: Rritja ekonomike në Kosovë është e pamjaftushme

Guvernatori i Bankës Qendrore të Kosovës, Bedri Hamza ka thënë se Kosova ballafaqohet me probleme ekonomike si: deficiti i lartë tregtar, papunësia e lartë dhe investimet e huaja jo të mjaftueshme.

Ai këto i tha në punimet e samitit dyditor “Stabiliteti financiar rajonal në rrethana të ndryshueshme globale”, që është mbajtur në Beçiq të Malit të Zi.

Duke marrë pjesë në panelin diskutues të guvernatorëve “çelësi i sfidave të politikës monetare dhe të mbikëqyrjes bankare në vitin 2016”, guvernatori Hamza është shprehur se “në Kosovë kemi një rritje ekonomike ndër më të lartën në rajon, e cila sillet mesatarisht, prej 3.8-4 %, e cila si rritje duket e lartë, por për një ekonomi të vendit tonë, bazuar në zhvillimin ekonomik të saj, nuk mjafton”.

“Ballafaqohemi me deficit të lartë tregtar, papunësia po ashtu e lartë, investime të huaja jo të mjaftueshme”, tha ai.

Hamza u përqendrua në sistemin bankar në vend, i cili është i përbërë prej 10 bankave, prej tyre tetë me kapital të huaj dhe dy vendore, ndërkohë tri banka më të mëdha vijnë nga vendet e BE-së dhe kanë sjellë përvoja të mira të bankingut modern.

Sipas guvernatorit Hamza, Kosova renditet e para me shkallën më të ulët të kredive jopërformuese të cilat këtë vit kanë shënuar shifrën e 5.6% e që janë një tregues i mirë i shëndetëshmërisë së sistemit.

Ai u shpreh se kreditimi mund të rritet edhe më tej por që i takon biznesit që të konkurkurojnë me plane të detajuara dhe plane të mira biznesi në mënyrë që të jenë atraktiv edhe për bankën përkatëse që do të ofron kredi.

Ndërsa i pyetur në debatin rreth temës së shkallës së ulët të kredive me probleme që i ka Kosova, guvernatori Hamza theksoi se si përparësi e një përformance të tillë është fakti se “kemi të bëjmë me një sistem të ri bankar të ndërtuar mbi bazën enjë bankingu bazuar në rregullativën moderne, ku spikatin bankat që ushtrojnë aktivitet në vend kanë sjellë përveç kapitalit të tyre monetar edhe përvojat dhe praktikat më të mira të bankingut modern”.

“Bankat janë më të kujdesshme në vlerësimin e lëshimit të një kredie pa ua bazuar mirë në planin e biznesit të asaj kredie. Që nga paraqitja e krizës, BQK ka realizuar në vazhdimësi stres testet duke u bazuar në shembujt e vendeve që kanë përjetuar krizën. Rol jashtëzakonisht të madh po luan edhe rregullativa dhe korniza ligjore e përafruar më atë të BE-së. Sistemi bankar në vend ka marrë asistencë të vazhdueshme ndërkombëtare, e cila ka ndihmuar në ndërtimin e një mbikëqyrje të bazuar në rregullativë moderne dhe strikte. Piku i kredive joperformuese ka qenë diku në 8.7 % që ishte po ashtu më i ulëti se shumica e vendeve të rajonit që përballën me një shifër dyshifrore të këtyre kredive”, tha ai./Telegrafi/