Ymeri kërkon drejtësi për çamët

Kryetari i Lëvizjes Vetëvendosje, Visar Ymeri ka kërkuar që të hidhet dritë mbi padrejtësitë historike që janë bërë ndaj komunitetin çam të shqiptarëve.

Ai, në një publikim në Facebook, ku njoftoi se sot me një delegacion të Lëvizjes Vetëvendosje ka marrë pjesë në Kongresin e Partisë Demokratike për Integrim dhe Unitet në Shqipëri, ndërlidhi çështjen e njohjes së vrasjes së armenëve në Luftën e Parë Botërore si gjenocid nga Bundestagu gjerman, me padrejtësitë e bëra ndaj çamëve.

“Me një delegacion nga Lëvizja VETËVENDOSJE!, morëm pjesë në Kongresin e Partisë Demokratike për Integrim dhe Unitet në Shqipëri. Jemi dëshmitarë se si para disa ditësh Gjermania njohu gjenocidin armen, të ndodhur një shekull më pare. Pra, popujt e tjerë nuk harrojnë. As ne nuk duhet t’i harrojmë padrejtësitë që janë bërë mbi ne, e veçanërisht mbi çamët. Jo për të kërkuar hakmarrje por për të ndërtuar sigurinë se nuk do të na përsëriten më, dhe për të kërkuar vendosjen e një drejtësie të pranueshme për ato raste. Pa u vendosur drejtësia nuk mund të ketë fqinjësi të mirë e mirëbesim të ndërsjellë”, thuhet në publikimin e tij. /Telegrafi/