Veseli përgëzon Azem Sylën për dorëheqje, e quan akt fisnik vendimin e tij

Kryetari i Kuvendit të Kosovës, Kadri Veseli e ka mirëpritur dorëheqjen nga të gjitha përgjegjësit institucionale të deputetit i cili gjendet në arrati, Azem Sylës.

Veseli përmes një postimi në Facebook ka shkruar se me këtë veprim ai po vendos një precedent të ri të qytetarisë dhe përgjegjësisë publike që duhet të shërbejë si standard dhe model për të gjithë ata që gjenden në rrethana të ngjashme.

Postimi i plotë:

Përshëndes dhe përgëzoj deputetin e Kuvendit te Kosoves, z. Azem Syla, për aktin fisnik të dhënies së dorëheqjes prej mandatit të deputetit për ti hapur plotësisht rrugën organeve të drejtësisë në procesin e zbardhjes dhe trajtimit të çështjes së hapur ndaj tij. Me këtë veprim ai po vendos një precedent të ri të qytetarisë dhe përgjegjësisë publike që duhet të shërbejë si standard dhe model për të gjithë ata që gjenden në rrethana të ngjashme. Prandaj unë inkurajoj të tjerë aktorë politikë dhe funksionarë të lartë shtetërorë, që gjenden para akuzave apo kanë çështje të tilla të hapura me drejtësinë, që të ndjekin rrugën e njëjtë dhe të tërhiqen nga detyrat e rëndësishme që kanë në mënyrë që ta lënë drejtësinë sa më të lirë në përmbushjen e detyrës së vetë.