Zyrtarët e MPB-së vikend në bregdet dhe mëditje

Dhjetëra zyrtarë të Ministrisë së Punëve të Brendshme të Kosovës kanë udhëtuar dje për në Shqipëri, për kinse përgatitje të Ligjit për Azil, raporton lajmi.net

Mësohet se janë 28 persona dhe se kjo gjë ndodh shumë shpesh viteve të fundit në këtë ministri.

Burime të lajmi.net brenda MPB-së bëjnë të ditur se ata shkojnë në Durrës me pretekstin për përgatitje të ligjeve dhe akteve, por e bëjnë për të fituar mëditje, ngase një gjë e tillë fare leht dhe mund të bëhet edhe në ndonjë qendër hoteliere apo rekreative brenda vendit.

Me një përllogaritje të thjeshtë, mëditjet për 28 persona, për dy ditë, rezultojnë 56 sosh.

Një e tillë paguhet 51 euro, duke mos harruar që këto nuk hyjnë pagesat e ushqimeve dhe qëndrimit.

“Mund të shkojnë kudo në Kosovë të mblidhen e të përgatisin akte nënligjore, ligje e gjithçka tjetër, por dalin jashtë Kosovës, gjithmonë me qëllim që të marrin mëditje”, shpjegon ky burim.

Drejtoreshën e zyrës për media në MPB, Rroksana Qarri ka thënë se deri të hënë nuk mund të kthejë përgjigjeje për këtë.