PriFest me jurinë e FIPRESCI

Federata ndërkombëare e kritikëvë të filmit FIPRESCI për herë të parë sjell jurinë në një festival në Kosovë.

Në vazhdën e risive që Prishtina International Film Festival ka rezervuar për këtë edicion, një tjetër lajm shumë i rëndësishëm- një juri e rëndësishme ndërkombëtare, ajo e Federatës Ndërkombëtare të Kritikëve të Filmit FIPRESCI tani e tutje do të jetë juri e rregullt në festivalin Prishtina International Film Festival për të vlerësuar dhe përzgjedhur filmin më të mire të kategorisë së filmave të Ballkanit që do të fitojë International Film Critics’ Award – çmimi FIPRESCI. Kjo juri vjen në Kosovë, në një festival filmi, për here të parë, ndërkohë që është prezente në shumë festivale të mëdha e rëndësishme në botë.

Fatos Berisha, drejtor artistik i PriFest është shumë i kënaqur me këtë arritje:

“ Ka disa vite që kemi zhvilluar marrëdhënie me FIPRESCI-n në festival duke shfaqur filmat e tyre fitues nga juritë e FIPRESCI-t në festival të tjera. Këtë vit ata u ofruan që të sjellin jurinë e tyre në PriFest duke e vlerësuar seriozitetin e festivalit dhe kualitetin e programit. Kjo na bën shumë të lumtur sepse kjo juri është prezente edhe në shumë festivale të rëndësishme në botë, dhe tani e tutje do të jetë edhe në Kosovë dhe atë për të vlerësuar filmat në kategorinë e programit ‘Gjak e mjaltë’ (filmat nga Ballkani). Ne jemi krenar që si festival kemi arritur ndërkombëtarisht të gëzojmë një reputacion të rëndësishëm. Kjo na jep vullnet dhe energji për të zhvilluar festivalin edhe më shumë”

Klaus Eder, Sekretar Gjeneral i Asamblesë të Përgjithshme të FIPRESCI lidhur me këtë u shpreh:

“Ne jemi të lumtur që vijmë në Prishtinë me juri për herë të parë. Me këtë e fusim regjionin dhe Kosovën në hartën tonë filmike botërore. Festivalet ofrojnë mundësinë më të mirë për t’u njohur me kinemanë botërore – sidomos me faktin se shumica e kinemave në repertorin e tyre pasqyrojnë një segment të vogël të kinematografisë botërore, dhe kryesisht shfaqin filma të dominuar nga Hollywood-i. Si kritik të filmit, është në interesin tonë, e shpeshherë edhe kënaqësi e jona, të mbështesin kinematografitë vendore në të gjitha format dhe diversitetin e tyre, duke e cmuar filmin si pjesë e rëndësishme e kulturave kombëtare dhe identitetit. Ne këtë e bëjmë duke shkruar për filmin. Dhe poashtu duke shpërblyer filmin më të mirë (nga pikëpamja jonë) me cmimin ‘FIPRESCI – Çmimi i kritikëvë ndërkombëtar’. Ky cmim tanimë është etabluar në festivalet ndërkombëtare të filmit, dhe ka qëllim promovimin e filmit si art, e sidomos të inkurajojë kinemanë e re. Programet tona të fituesve fitues të jurive të FIPRESCI tentojnë të shfaqin begatinë dhe diversitetin e kinematografisë botërore, dhe reflektojnë pikëpamjen profesionale të jurive tona ndërkombëtare’.

Çmimi FIPRESCI ipet në festival ndërkombëtare të filmit apo në festival të filmit të rëndësisë së vecantë. Asambleja e Përgjithshme vendos në cilat festival duhet të sjell jurinë e vet si dhe cila kategori e filmave do të vlerësohet nga kjo juri. Juria e përzgjedhur nga FIPRESCI për festivalin Prishtina International Film Festival këtë vit do jetë e përbërë nga kritikët nga Izraeli, Holanda dhe Italia.