Kelmendi: Nevojiten 7-20 miliardë euro investime, për 120-200 mijë vende të reja të punës

Deputeti i PDK-së në Kuvendin e Kosovës dhe biznesmeni Ramiz Kelmendi, ka thënë se investitorët e jashtëm të cilët vijnë të investojnë në Kosovë, nuk mund ta përcjellin gjendjen aktuale në Kosovë por ata informohen përmes mjeteve të informimit.

“Një ardhje e investitorëve të huaj është një ambasador në Kosovë, ai është ambasador i imazhit të Kosovës në botë”, është shprehur Kelmendi, në emisionin “Politikë” në Tribuna Channel.

Kelmendi ka thënë se korrupsioni është problem i investimeve. Ai shtoi se si biznesmen është befasuar me pritjen që i është bërë në Maqedoni.

“Kur do të zhvillohet Kosova, industria do të jetë ajo e cila do të zë një vend kryesor, e bujqësia do të zë një vend të vogël. Neve na nevojiten prej 7 deri në 20 miliardë euro investime për 120 deri 200 mijë vende të reja të punës”, është shprehur deputeti i PDK-së.

Kelmendi ka thënë se nuk duhet asnjëherë humbur shpresat se kjo nuk mund të arrihet në një të ardhme. Për më tepër, ai ka theksuar se duhet punë për të ndryshuar ekonomia e vendit.

Sipas tij, duhet të fillohet proces, duhet të merren iniciativat, e duhet edhe të zgjatet orari i punës për punëtorët.