Hip-hopi në Kosovë dhe eksperimentet (Video)

Ashtu sikur edhe në shumë zhanre të tjera muzikore, edhe muzika rap/hip-hop ka pësuar ndryshime të mëdha ndër vite. Derisa dikur te këngët rep paraqiteshin problemet e përditshme dhe kësisoj nëpërmes tyre shprehej një revoltë e madhe, sot gjërat kanë ndryshuar.

Duke qenë se në ditët e sotme një rëndësi të madhe kanë edhe videoklipet, ajo në çfarë haset në të shumtën e rasteve janë ato klipe me shumë femra të bukura, vetura luksoze e shumë para, që të bënë të mendosh se të gjithë jetojnë në një luks të këtillë, raporton Express i KTV-së.

Por, ka edhe diçka tjetër që po ndodh prej vitesh në këtë zhanër. Trendi i bashkëpunimeve të shumta ka përfshirë edhe reperët kosovarë, madje ata janë shumë të kërkuar nga këngëtarët e zhanreve të tjera, për të sjellë kështu diçka më interesante. Duke u munduar ta bëjnë këtë, shpeshherë hip-hop artistët i shohim teksa bëjnë edhe përzierja të tepruar, e që nuk i shkon aspak muzikës së tyre. Nga një gangster i rrugëve, i kemi dëgjuar teksa këndojnë këngë dashurie, duke u shndërruar në një Romeo të përvuajtur, dhe këto këngë po arrijnë të kapin miliona klikime.

Një eksperiment i tillë ishte edhe bashkëpunimi i Getoar Selimit me këngëtarin e muzikës tallava, Meda. Pjesë e këngës ishte edhe Tuna, por që ajo nuk ishte ndonjë surprizë e madhe, ashtu siç ishte Meda. Por, gjithsesi bashkëpunimi iu rezultoi i suksesshëm, pasi kënga e tyre “Ditën ta boj natë” u shndërrua në hit. Pa dyshim se kjo sikur nxiti reperët e tjerë për të vazhduar në këtë rrugë.

Një përzierje të tillë e bënë edhe grupi “Kaos” me këngëtarin Blero në këngën “Kam mall”. Më pas ishte Skivi ai që erdhi në një bashkëpunim me Nora Istrefin, e ku çudia ishte Mimoza Shkodra, po ashtu e njohur për muzikën folk. Pjesë e kësaj liste janë edhe Etnon që na befasuan në një këngë me Teuta Selimin, e tutje edhe me Sinan Vllasaliun, e më pas edhe 2 Ton me Labinot Tahirin. “Kcenja mbi tavolina” ishte një tjetër rast kur dy reper të njohur si Lumi B e Ledri Vula erdhën me Ermal Fejzulllahun, i cili gjithashtu duket të jetë më shumë i koncentruar kah muzika që sjell thjesht para.

Duke i parë eksperimentet e shumta të këtij lloji, duket se ky trend do të vazhdojë. “Surprizat” mbetet të shihen.