“Sindroma Hajdar K. Shtimja, duhet të futet në fjalorin e gjuhës shqipe”!

Analisti dhe studiuesi Daut Dauti, ironizon mediat shqiptare, të cilat kohë më parë e përhapën si lajm shakanë për Hajdar K. Shtimen e shekullit XIX dhe atij të sotëm që kishte komunikuar me themeluesin e rrjetit Facebook, Marck Zuckerberg. Sipas Dautit, Hajdar K. Shtimja duhet të jetë shprehje e re në fjalorin e gjuhës shqipe. Madje, ai e ka edhe definicionin për këtë. Më poshtë mund ta lexoni të plotë postimin e tij në Facebook.

“Gjuha shqipe, sikur gjuhët tjera, duhet të pasurohet vazhdimisht me fjalë dhe shprehje të reja të cilat emërtojnë dhe shpjegojnë situata të reja. Një shprehje e re që duhet të hyjë në fjalorin e gjuhës shqipe është ‘Hajdar K. Shtimja’, e cila, kohëve të fundit, vuri në pah sindromën e sëmundjes së mediave shqipe.

Më poshtë figuron sqarimi i shprehjes adekuate në fjalor:

Sindromi Hajdar K. Shtimja: – Grup i simptomave që paraqiten së bashku dhe që karakterizojnë sëmundjen (zakonisht mentale) të mediave shqiptare e cila rezulton në nevojën apo dëshirën për të botuar informata të paverifikuara;

– Dëshirë e paqëllimtë për të gënjyer për shkak të mungesës së profesionalizmit;

– Dëshirë për të gënjyer me qëllim që te lexuesi të krijohet një mendim i caktuar në mënyrë që nga kjo të përfitojnë grupet e dyshimta politike/mafioze/afariste/religjioze etj.;

– Dëshirë për të gënjyer opinionin me qëllim që pronarët e medias dhe redaktorët të fshehin mënyrën joligjore të pasurimit të tyre dhe lidhjeve të dyshimta me politikanët në pushtet.

(Natyrisht, ky nuk është shpjegim përfundimtar. Mund të shtoni edhe ju sygjerimet tuaja)”, ka shkruar Dauti. /Telegrafi/