Mbi 50 biznese nga Kosova, pjesëmarrëse në Panairin e Izmirit

Aleanca Kosovare e Bizneseve (AKB) në kuadër të Javëve të Biznesit Kosovar 2014, me moto: Unë konsumoj produkte vendore, Po Ju? e kryesuar nga Agim Shahini, Kryetar i AKB-së dhe Ramdan Hasani, zëvendësministër i Zhvillimit Ekonomik të Kosovës dhe mbi 50 biznese nga Kosova po marrin pjesë në Izmir- Turqi, në Panairin e Ushqimit dhe Teknologjisë ushqimore- Foodex 2014.

Gjatë hapjes zyrtare të pranishëm ishin Guvernatori i Izmirit Mustafa Toprak,Deputeti me origjinë shqiptare në Parlamentin Turk Rifat Saiti, Nënkryetari i bashkisë së Izmirit, zëvendësministri i Bujqësisë së Turqisë si dhe shumë biznese nga vende të ndryshme të botës.

Agim Shahini, Kryetari i AKB-së gjatë fjalimit përshëndetës në hapjen zyrtare të Panairit tha se “Kosova është vend interesant për investime nga Turqia dhe në këtë drejtim kemi shumë investitorë siç janë ÇALIK dhe LIMAK një nga investitorët më të fuqishëm turk në Kosovë dhe shumë të tjerë të cilët kanë marr pjesë në privatizim dhe në ndërtim të infrastrukturës duke gjetur veten si në shtëpinë e tyre”, tha ai.

Sipas tij, shqiptarët e kanë konsideruar gjithmonë si shtëpi të dytë dhe sot ky shtet ka me miliona shqiptarë dhe gjithë këta janë pjesë e zhvillimit ekonomik dhe politik të integruar në Turqi dhe në këtë drejtim e ftoj Diasporën Shqiptare të vijnë dhe të investojnë në Kosovë.

Gatishmëria shtetërore dhe biznesore e Turqisë për ta mbështet Kosovën nuk ka munguar asnjëherë tha në fjalimin e vet Organizatori Osman Gencer, Drejtori gjeneral i Kompanisë së panaireve Genciz.

Shahini në fund falënderoi organizatorin Joudy Group për mundësin që ju ka dhënë bizneseve të Kosovës për të marrë pjesë dhe për të promovuar vlerat e ekonomisë së Kosovës, por njëkohësisht këso organizimesh do të vazhdojnë edhe ne vendet e tjera si organizime të përbashkëta. /Telegrafi/