Rriten shitjet industriale në Gjermani

Kërkesa e fortë e brendshme ka sjellë rritje të shitjeve industriale në Gjermani në të dhënat që i referohen muajit mars.

Por nga ana tjetër, zhgënjyese duket se është kërkesa e jashtme, që sinjalizon në këtë mënyrë një fillim modest të vitit për sektorin prodhues në ekonominë më të madhe të rajonit. Porositë për produkte të sektorit gjatë muajit mars janë rritur kështu me 0.9 për qind. Pavarësisht rritjes, diçka e tillë shënon edhe një dështim të pritshmërive.

Në terma të përgjithshëm, kërkesa e dobët për sa i përket tre mujorit të parë të vitit, paralajmëron ndoshta edhe një rishikim të projeksioneve për rritjen afat-shkurtër të sektorit industrial gjerman.

Ekspertët shprehen se dobësia e përkohshme në disa prej tregjeve të eksportit, përfshirë edhe atë të Shteteve të Bashkuara të Amerikës, Britanisë së Madhe dhe Kinës, kanë pasur një rol kyç në performancën jo dhe aq të kënaqshme të sektorit gjatë tre mujorit të parë të vitit. Kërkesa e brendshme nga ana tjetër, vihet re në rënie për sa i përket mallrave të konsumit, ku rënia regjistrohet në 2.2 për qind në terma mujorë.

Gjithsesi, sipas analistëve, kërkesa e fortë e brendshme, si dhe klima pozitive e biznesit, parashtrojnë një trend të kënaqshëm për sektorin industrial gjerman. Për sa i përket muajit Shkurt, të dhënat janë rishikuar në një rënie prej 0.9 për qind. /Telegrafi/