Për tre muaj bankat dhanë 104 milionë euro kredi (Video)

Niveli i shpërndarjes së kredive nga bankat po vazhdon të shënojë rritje, raporton KTV.

Sipas të dhënave të fundit nga Banka Qendrore, deri në fund të marsit të këtij viti janë dhënë rreth dy miliardë euro kredi, duke iu afruar nivelit të depozitave që në periudhën e njëjtë kanë arritur në 2.4 miliardë. Nga kjo shumë, 1.8 miliardë i kanë lënë depozita qytetarët.

Brenda tre muajve bankat kanë dhënë 104 milionë euro kredi të reja dhe ky trend pritet të vazhdojë edhe muajt në vijim. Bazuar në të dhënat e fundit të Bankës Qendrore të Kosovës, norma mesatare e kamatave të kredive ka arritur në rreth 8 për qind, ndërsa në depozita 0.8 për qind.

Sipas të dhënave, të hyrat që bankat i kanë fituar nga interesi në kredi për tre muaj arrijnë në 95 milionë euro.

Drejtues të BQK-së i kanë thënë KTV-së se niveli i kredive do të vazhdojë të bjerë, përcjell Koha.net. Guvernatori i BQK-së Bedri Hamza ka thënë se sektori bankar do të vazhdojë të performojë pozitivisht.

Nga ana tjetër, ekspertë të sektorit bankar thonë se në mungesë të formave të tjera të financimit kanë mbetur vetëm bankat ato që mund të plotësojnë nevojat e qytetarëve për mjete.