Në Kazakistan zgjidhet “’Miss’ Kali”, në Gjakovë zgjidhet “Miss Lopa”

Me organizimin e panairit të gjedhit që u mbajt tek “Butsina e Begut” në Korenicë, është mbyllur aktiviteti katër ditor i Drejtorisë së Bujqësisë, Pylltarisë dhe Zhvillimit Rural të Komunës së Gjakovës, “Ditët e Agrobiznesit – Kosova 2015” që është mbështetur nga Ministria e Bujqësisë, Pylltarisë dhe Zhvillimit Rural të Kosovës.

Me rastin e mbajtjes së këtij panairi, Bekim Ermeni, drejtor i Drejtorisë së Bujqësisë, ka thënë se në secilën ditë ka pasur aktivitete nga sektori i vreshtarisë dhe verarisë, sektori i pemtarisë dhe perimtarisë, sektori i bletarisë dhe sot me panairin e gjedhit – sektorin e blegtorisë.

Zëvendësministri në Ministrinë e Bujqësisë, Pylltarisë dhe Zhvillimit Rural, Vezir Januzi, është shprehur se ky panair paraqet një vlerësim për fermerët e vyeshëm që punojnë për shtimin e cilësisë së blegtorisë dhe se këtë vit MBPZHR-ja ka ndarë 15 .9 milion euro të parapara për investime në përmirësimin e kushteve dhe rritjes së cilësisë.

Pas vlerësimit nga ana e jurisë, në krye me profesor Hajrip Mehmeti, nga shtatë kategoritë e racave të prezantuara në panairin e sivjetshëm, fermeri më i mirë është shpallur Vehbi Dervishi nga Korenica me gjedhin e tij të racës simental.

Profesor Hajrip Mehmeti, ka konsideruar se në këtë vit konkurrenca ka qenë jashtëzakonisht e madhe dhe se ka qenë e vështirë të zgjidhet më i miri, por se për një nuancë më e mirë ishte gjedhi i racës simental.

“Kjo është një dëshmi se fermerët tanë janë vetëdijesuar dhe po kultivojnë sipas tretmanit të duhur gjedhët, e me këtë përkushtim po ju ofrohemi më shumë fermer ëve evropianë”, ka theksuar Mehmeti.