Jahjaga: Hardhfest – vazhdim i traditës së lashtë popullore

Presidentja e Kosovës Atifete Jahjaga, në hapjen e festivalit të vjeljes së rrushit “Hardhfest” në Rahovec, ka thënë se “kjo është festë shumë e rëndësishme”!

“Kjo është festa më e rëndësishme e stinës, që dëshmon një traditë të lashtë të popullit të Kosovës për të filluar mbledhjen e bereqetit të kësaj toke kaq të vlefshme të shtetit tonë. Vjelja e rrushit nuk është vetëm një festë e zakonshme dhe as edhe vetëm një shënim i një tradite të kësaj ane, por fillim i një viti të mbarë për familjet tuaja dhe përgjithësisht për shtetin tonë dhe shoqërinë tonë”, thuhet në kumtesën e Presidencës.

Presidentja po ashtu ka theksuar se institucionet shtetërore janë ato që duhet t’u ndalin në ndihmë bujqve dhe se duhet të krijojë kushte për punën e tyre.

“Jemi këtu me ju si institucione të vendit për të dëshmuar se sa rëndësi për të gjithë ne ka përkujdesja për punën e tokës, për bujqësinë dhe në veçanti për vreshtarinë”, ka shtuar ajo.

Jahjaga, po ashtu ka vizituar edhe fshatin Krushë e Madhe dhe Kooperativën Bujqësore Krusha, në kuadër të promovimit të produkteve vendore. /Telegrafi/