Përplasen Gërxhaliu e Shahini

Mbledhja e tretë e Këshillit Kombëtar për Zhvillim Ekonomik (KKZHE) është shndërruar për një moment arenë për larjen e hesapeve nga përfaqësuesit e bizneseve. Aty haptas përfaqësuesit e bizneseve shfaqën se cilit krah politik i përkasin dhe cilën parti e favorizojnë. I pari që ka nxitur reagime në këtë mbledhje ka qenë kryetari i Aleancës Kosovare të Bizneseve, Agim Shahini, i cili me të marrë fjalën tha se nuk do të jetë servil ndaj Qeverisë “Mustafa” për t’ia duartrokitur secilin vendim.

Ai ka dhënë disa vërejtje për pakon e re fiskale dhe për udhëzimet administrative. Pas tij fjalën menjëherë e kërkoi kryetari i Odës Ekonomike të Kosovës, Safet Gërxhaliu, i cili akuzoi AKB-në për plagjiaturë të një prezantimi. “AKB-ja ka prezantuar një punim plagjiaturë, atë e ka bërë para KKZHE-së rreth akcizës në pijet joalkoolike”, ka thënë Gërxhaliu. Ai më tej ka thënë se këtë çështje e ka ngritur OEK-u dhe kanë marrë përgjigje edhe nga ministri Hoti se do të gjenden modalitetet për heqjen e akcizës. Këtë e ka konfirmuar ministri Hoti, i cili ka thënë se për të hequr akcizën duhet të gjetur burim tjetër të të hyrave për buxhetin, pasi ka një kosto buxhetore prej 8 deri në 13 milionë eurosh.

Në këtë zhurmë të krijuar fjalën e mori edhe Arian Zeka, kryetar i Odës Ekonomike Amerikane nw Kosovës (OEAK), i cili shtoi se Qeveria është treguar servile ndaj bizneseve. “Kjo Qeveri ka inkorporuar shumicën e kërkesave të tyre në pakon e re fiskale”, shtoi Zeka. Kurse, kritikave për pakon e re fiskale i janë kundërpërgjigjur ministri i Financave, Avdullah Hoti, dhe drejtori i Administratës Tatimore të Kosovës (ATK), Nahit Sharku. Hoti ka thënë se Qeveria në pakon e re financiare i ka përfshirë të gjitha kërkesat e bizneseve.

E Sharku ka thënë se për të dhënë kritika është mirë që të lexohen ligjet dhe Udhëzimi Administrativ. Në fund të këtij debati ka ndërhyrë edhe kryesuesja e Këshillit, ministrja e Tregtisë dhe Industrisë, Hykmete Bajrami, e cila u bëri me dije se nuk do t’i lejojë përfaqësuesit e bizneseve të debatojnë në këtë nivel në mbledhjet e KKZZHE-së. Kryetari i AKB-së, Agim Shahini, ka qenë pjesëmarrës në takimet që PDK-ja i bënte me përfaqësuesit e bizneseve gjatë fushatës për zgjedhjen e 8 qershorit të vitit 2014. Kurse kryetari i OEK-ut ka shkuar në takimet edhe të partive të tjera në fushatën për zgjedhjet e vitit të kaluar.

Kurse, kreu i Odës Ekonomike Amerikane, Arian Zeka, nuk ka marrë pjesë në takimet e partive para zgjedhjeve. Në këtë mbledhje ka folur edhe kryeministri i Kosovës, Isa Mustafa, i cili tha se infrastruktura, sektori i energjisë, sektori i bujqësisë dhe investimet e huaja në Kosovë mbeten ndër faktorët kyç për zhvillimin ekonomik të vendit.

Ndonëse, për sektorin e energjisë kryeministri Mustafa pranon se ka mungesë dhe janë duke punuar mjaft për të gjetur forma të shtimit të kapaciteteve për furnizim me energji elektrike. “Fokus i kësaj Qeverie mbetet edhe përmirësimi i klimës për bizneset dhe ardhja e investitorëve të huaj”, shtoi Mustafa, shkuan Zëri.

Kurse deputeti nga radhët e LDK-së, Muhamet Mustafa, foli për mbrojtjen e investitorëve dhe mundësinë e shkurtimit të kohëzgjatjes së kontesteve biznesore, nga një vit që është tani të bëhet më pak se 6 muaj. Ministri i Drejtësisë, Hajredin Kuçi, theksoi se roli i kësaj Ministrie është edhe shqyrtimi i ankesave të investitorëve të huaj për barrierat dhe pengesat që ata i kanë. /Telegrafi/