Vig Poppa flet për arsyet e mungesës në skenë

Vigani i grupit Kaos sapo ka publikuar projektin e tij më të ri në bashkëpunim me reperin ferizajas 2Ton, të titulluar “Kapi lekt”.

Vig Poppa u rikthye pas një pauze në skenën muzikore duke sjellë një projekt që në vetëm pak orë arriti një numër të madh klikimesh në kanalin Youtube.

Për Telegrafin Vigani tha se ishte gjendja emocionale arsyeja e mungesës së tij në skenë, e cila pa dyshim se u vërejt shumë.

“Pauzova se nuk isha emocionalisht në gjendje me punu shumë në muzikë, pasi babai im u nda nga jeta para dy viteve e gjysmë, pastaj më lindi djali, i cili ka shtatë muaj dhe vendosa t’i përkushtohem familjes”, tha Vigani, i cili gjatë sezonit megjithëse jo aktiv me prurje të reja ka mbajtur koncerte të shumta në vende të ndryshme.

Për bashkëpunimin me 2Ton, reperi tha se ka ndodhur rastësisht dhe është shumë i kënaqur me të.

“Me 2Ton ndodhi rastësisht, më propozi dhe më pëlqeu shumë. Jam shumë i kënaqur me këtë projekt pasi ai më ka pëlqy si artist dhe e respektoj si muzikant e krijues”.

Për fund rep artisti tha se do të vijë me projekte të reja por se është duke punuar me hapa të ngadalshëm por të sigurt, duke dashur t’i lë kohë krijimeve të reja pas rikthimit. /Telegrafi/