Ëmbëlsirë me spinaq

Nevojiten:

* 400 g patate të ziera e të ftohura
* 75 g miell
* arrë muskate e freskët
* vaj për kallëp

Për mbushje:

* 350 g spinaq
* 2 thelpinj hudhre
* 1 lugë gjalpë
* 2 dl ajkë e ëmbël
* 200 g djathë gorgonzole
* 2 ve
* 2 lugë fara luledielli
* kripë, piper i zi

Qërohen patatet e ziera e të ftohura dhe ndrydhen si për pure, shtohen mielli, arra muskate, kripa e piperi. Zihet një brumë dhe shtrihet në formë rrethi, qitet në kallëp të rrumbullakët me perimetër prej 26 cm.

Për mbushje: pastrohet spinaqi. Vihet në zjarr uji i kripur dhe, kur të vlojë, qitet në të spinaqi. Vlohet shkurt, sa për t’u zbutur. Hudhra qërohet dhe pritet. Spinaqi kullohet dhe, kur të ftohet pak, gri het trash dhe shtrydhet mes shuplakave të duarve, në mënyrë që të mbetet sa më pak lagështi.

Nxehet gjalpi, qiten në të spinaqi e hudhra, përzihen për 2 minuta, në mënyrë që të avullohet lagështira. Ndërkohë, me anë të pirunit,.ndrydhet djathi, ngrohet bashkë me ajkë të ëmbël, përzihet mirë, që të shkrihet plotësisht. Kur të ftohet pak, shtohen vezët e rrahura.

Kripet dhe piperoset, kësaj mase i shtohet spinaqi. Provohet shija dhe sipas nevojës i shtohet kripë e piper. Kjo masë qitet mbi brumin e patateve. Rrafshohet mirë sipërfaqja, sipër u qiten farat e qëruara të lulediellit, shtypen nga pak sipër.

Kallëpi futet në furrë të nxehur në 200 gradë C, piqet për 20 minuta.

Pastaj ‘ëmbëlsira’ mbulohet me letër të yndyrshme, në mënyrë që sipërfaqja të mos errësohet tepër dhe pjekja vazhdon edhe për 25 minuta.

Pritet dhe shërbehet menjëherë.