Andy Rubin i Google me plane për krijimin e robotëve të rinj

Për mos t’ia lënë gjithë famën rivalit të saj Amazon sa i përket robotëve, Google i ka zbuluar planet e saj në këtë drejtim, duke thënë se tashmë është duke punuar në shumë projekte që përfshijnë robotët, dhe se këto projekte do të udhëhiqen nga njeriu i cili e ka krijuar sistemin operativ Android, Andy Rubin.

Në gjashtë muajt e fundit, Google ka arritur që t’i blejë 6 kompani të ndryshme me teknologji të ndryshme për krijimin e robotëve, edhe pse planet e saj nuk janë aq të mëdha sa ishin me sistemin operativ Android, i cili kompanisë i ka sjell miliona dhe dominim të plotë në tregun e telefonave të mençur mobil.

Sipas deklarimeve të Andy Rubin mund të thuhet se qëllimi i Google me këta robot është më shumë për ti automatizuar proceset e prodhimit, dhe për ta reduktuar nivelin e punës manuale nga njerëzit.

Për idetë e Rubin, Google tashmë ka bërë disa blerje, ndërsa mbështetjen e tij për këto projekte e ka dhënë edhe drejtori i Google, Larry Page, i cili më herët pati thënë se duhet të shmangemi sa më shumë nga detyrat e përsëritura, dhe ti zëvendësojmë ato me teknologji. / Telegrafi /