‘Superkarburanti’ të cilin askush nuk e do

Në Gjermani që nga muaji janar ka filluar shitja e karburantit ekologjik. Pompat e benzinës janë përplot me karburantin e ri ekologjik, mirëpo shumica e shpenzuesve nuk e dinë se çfarë fshihet prapa karburantit me emër E10, prandaj nuk e blejnë atë.

Shfrytëzuesit anekënd botës nuk kanë marrë përgjigje në pyetjet se çka është kjo lëndë djegëse ekologjike, nëse është më e mirë për motorin e automjetit, sa është shpenzimi i saj dhe a është ekonomike.

Kjo është arsyeja që pompat e benzinës janë përplot me karburant ekologjik të cilin thuajse askush nuk e blen- raporton Deutsche Welle.

Sido që të jetë, Klaus Reindl nga auto-moto klubi gjerman ADAC, vlerëson se prodhimi i karburantit ekologjik nuk do të ndërpritet.

“Këtë do ta kundërshtonte Bashkimi Evropian, por edhe Qeveria gjermane. Ata e kanë nxjerrë këtë lloj karburanti, të ashtuquajtur E10 për të penguar ndotjen nga lëshimi i dyoksidit të karbonit”, ka thënë Reindl, mirëpo ka kërkuar që të jepen informacione të detajuara për të shmangur dyshimet e shfrytëzuesve për këtë lëndë djegëse. /Telegrafi/