Tetrisi ndihmon në shërimin e syrit “dembel”

Mjekët kanadezë kanë zbuluar mënyrën inovative për shërimin e syrit “dembel” (shikimi i dobësuar ose ambliopia), ndërsa kjo është luajtja e videolojës së popullarizuar tetris.

Ekipi i shkencëtarëve nga Universiteti McGill ka zbuluar se si kjo lojë ndihmon në “trajnimin” e syve për të punuar së bashku.

Në studimin e kryer në 18 persona të rritur është zbuluar se si kjo metodë është më efikase se lidhja e zakonshme e syrit të shëndetshëm për t’u sforcuar përdorimi i të dobëtit. Hulumtuesit tani dëshirojnë të verifikojnë nëse kjo metodë do të jetë njëlloj e suksesshme edhe tek fëmijët.

Konsiderohet që të paktën një në 50 fëmijë janë të sëmurë nga ambliopia. Çrregullimi krijohet kur njëri sy nuk zhvillohet në mënyrë të rregullt, ndërsa shpesh me të shfaqet edhe strabizmi, respektivisht sytë fillojnë të shikojnë në drejtime të ndryshme.

Pa shërim adekuat kjo mund të shkaktojë humbjen e përhershme të shikimit në syrin më të dobët dhe mjekët përpiqen të intervenojnë sa më parë.

Robert Hess dhe kolegët e tij janë përpjekur të hulumtojnë qasje më të ndryshme dhe më të lehta për shërim. Me ndihmën e video syzave speciale janë përpjekur t‘i bëjnë të dy sytë të punojnë së bashku. Nëntë vullnetarë me ambliopi kanë mbajtur syze nga një orë në ditë, gjatë kohës së luajtjes së tetrisit, gjatë dy javëve.

Duke iu falënderuar syzave, njëri sy ka mundur të shikojë vetëm elementet që bien, derisa tjetri ka përcjellë se si ata përputhen në fund të ekranit. Grupi i dytë i vullnetarëve i është nënshtruar metodës së zakonshme të shërimit. Pas dy jave, grupi i parë ka treguar përmirësime të konsiderueshme të shikimit në raport me tjetrin.

Shkencëtarët thonë se si në këtë metodë mund të përdoren edhe lojëra tjera, dhe jo vetëm tetrisi. E rëndësishme është që sytë të mund të punojnë së bashku.