Dietë mesdhetare për depresionin

Lidhjet e stilit mesdhetar të dietës me uljen e rrezikut për të zhvilluar depresion, janë tashmë të njohura nga studimet e fundit mbi depresionin publikuar në Archives of General Psychiatry.

Më shumë se 10.000 të rinj në Spanjë plotësuan një pyetësor për ushqimin për të vlerësuar se sa shumë e ndiqnin ata modelin e dietës mesdhetare (që do të thotë, e pasur me fruta, perime, peshk, fruta të thata, drithëra e bishtajore; e varfër me mish dhe bulmet me shumë yndyra; e moderuar në konsumin e alkoolit).

Pas një ndjekje të të dhënave përgjatë 4 vjetëve, u vu re se personat që në dietën e tyre përqindjen më të lartë e zinin mishi dhe produktet me yndyrë, kishin rrezik më të lartë për të zhvilluar depresion se personat që në dietën e tyre përfshinin më shumë perimet, frutat, peshkun, bishtajoret dhe frutat e thata.

Efekti i vënë re në këtë rast iu atribuua dietës mesdhetare me arsyetimin se kjo lloj diete ndikon pozitivisht në funksionin endotelial i cili nga ana e tij përmirësonte prodhimin e derivateve të faktorëve neurotrofik të trurit, gjë që shoqërohet me zvogëlim të mundësive për depresion.

Fakti më i rëndësishëm është se përfshirja në një model të shëndetshëm diete mund të bëjë të mundur zvogëlimin e rrezikut për depresion. Interpretimi për këtë është se ushqimi i shëndetshëm mund të çojë në një funksion të përmirësuar të trurit dhe si pasojë në një elasticitet më të madh për të kapërcyer frustrimet e përditshme, për të kontrolluar stresin dhe konfliktet e personalitetit.

Individët që ndoqën dietë mesdhetare kishin një pakësim të rrezikut për depresion me mbi 30% sesa ata të cilët nuk praktikonin dietë mesdhetare. /Telegrafi/