Facebook krijon rivalin e Snapchat, e quan Slingshot

Pas refuzimit të Snapchat për tu shitur tek Facebook për një shumë marramendëse prej 3 miliardë dollarësh, kjo e fundit thuhet se është duke u bërë gati ta lansojë rivalin e aplikacionit të famshëm, të cilin do ta quajë "Slingshot".

Aplikacioni për të cilin është thënë se do të jetë "i thjeshtë dhe me ndërfaqe të shpejtë " është projektuar për të rivalizuar shumë drejtpërdrejtë me Snapchat, përmes ofrimit të videove dhe fotografive të shkurtra që zhduken vetvetiu vetëm pas një shikimi.
Madje thuhet se Facebook ka qenë duke punuar në këtë aplikacion për disa muaj, dhe se të njëjtin mund ta lansojë në fillim të muajit të ardhshëm.

Slingshot madje pritet të vijë me funksione edhe më të mira sesa ato që ofrohen nga Snapchat. Është thënë se njëri ndër funksionet do të jetë edhe TapTalk, një aplikacion i ri i video mesazheve, në të cilin përdoruesit “trokasin” lehtë apo e mbajnë foton e profilit të kontaktit për të dërguar menjëherë një foto ose video të shkurtër, e cila mund të shihet vetëm pas një shikimi nga marrësi.

Kohët e fundit, Facebook ka ndërprerë aplikacionet e saj të pavarura si Poke dhe Camera për iPhone.

Mirëpo, në ndërkohë rrjeti social ka lansuar aplikacionet tjera sikurse Paper dhe Facebook Messenger, ndërsa ka premtuar edhe shumë aplikacione tjera të reja të cilat megjithatë do të jenë të lidhura me platformën kryesore – atë të Facebook. /Telegrafi/