Facebook për Android tani lejon postimet edhe pa internet!

Me siguri se ka raste kur ju doni të postoni diçka, qoftë një tekst ose fotografi në profilin tuaj të Facebook, por nuk jeni në gjendje për ta bërë këtë për shkak të mungesës së internetit.

Kjo gjë mund të jetë mjaft e bezdisshme kohë pas kohe, sidomos kur ju shkruani tërë përditësimin e statusit ose e ngarkoni foton, ndërsa më pas e kuptoni se lidhja e internetit tuaj është zhdukur.

Mirëpo tani nuk keni pse të mërziteni për këtë, pasi që Facebook ka lëshuar një përditësim të ri të aplikacionit të saj në Android, i cili e sjell funksionin e postimit të statuseve tuaja edhe kur ju jeni offline.

Por si do të funksionojë kjo? Facebook e ka bërë shumë të thjeshtë këtë mundësi.

Nëse ju nuk keni mbulim të internetit wireless apo lidhja juaj e internetit mobil është humbur në kohën e shkrimit të statusit në Facebook, krejt çka ju duhet të bëni është ta publikoni atë.

Dhe më pas, në momentin e parë që telefoni juaj lidhet me internet, Facebook automatikisht do ta shtyjë postimin në profilin tuaj në faqe, pa pasur nevojë që ju ta shkruani ose të ngarkoni postimin e fotografisë ose tekstit, përsëri.

Versioni i ri i aplikacionit të Facebook për Android nuk ka asgjë më shumë, përveç disa përmirësimeve të vogla, të cilat rrjeti social nuk i ka specifikuar me saktësi. /Telegrafi/