Snapchat nuk do t’i zhduken përdoruesit sikurse mesazhet

Snapchat e ka ndërtuar popullaritetin e saj mbi idenë e fotografive që zhduken pas disa sekondash, mirëpo funksionet e reja të cilat i ka shtuar në aplikacion shfaqin interesin e kompanisë për ti mbajtur përdoruesit në shërbim, që ata të mos zhduken sikurse fotografitë.

Në fakt, Snapchat dëshiron që të ofrojë më shumë opsione në shërbim, dhe të mos varet vetëm një funksionalitet të vetëm, i cili do ta bënte shërbimin të mërzitshëm, krahasuar me opsionet rivale në rrjetet sociale.

Të enjten, Snapchat ka shtuar edhe mundësitë e dërgimit të tekstit dhe video-mesazheve në aplikacionin e saj për Android dhe iOS.

"Deri më sot, ne kemi vlerësuar se Snapchat-it i mungon një pjesë e rëndësishme e komunikimit: prezenca" thuhet në postimin e blogut të Snapchat, i cili synon ta arsyeton vendimin për opsionet e reja që janë shtuar.

Me funksionin e ri Chat, përdoruesit mund ta shtypin emrin e kontaktit në inboks, dhe të fillojnë dërgimin e mesazheve me tekst. Dhe njësoj sikurse funksioni i deritashëm, pas përfundimit të bisedës, ajo fshihet, edhe pse nëse përdoruesi dëshiron, biseda edhe mund të ruhet me një të shtypur të ekranit.

Edhe pse nuk ka asnjë shërbim i cili është identik me Snapchat, me sa duket kësaj të fundit janë duke ju tkurrur përdoruesit, gjë që e ka shtyrë kompaninë që të zgjerohet me funksione të reja, që garojnë me ato të shërbimeve tashmë të njohura. / Telegrafi /