Grand Theft Auto III për iOS dhe Android

Për hir të 10 vjetorit të lojës së popullarizuar Rockstar Games publikoi versionet e Grand Theft Auto III për iPhone, iPad dhe pajisjet e ndryshme me Android.

Loja origjinale më 2001 transformoi franshizën Grand Theft Auto duke prezantuar këndin e vështrimit nga personi i tretë dhe hartën e madhe.

Gjithashtu ishte e përcjellë me kundërthënie të shumta kryesisht në lidhje me nivelin e dhunës, trajtimin e femrave dhe pohimet për lavdërimin e aktiviteteve kriminale. Për një kohë të caktuar loja në Australi madje ishte e ndaluar për shitje.

Edhe në këtë version ju do të jeni Klodi nga Liberty City i cili depërton nëpër qarqet kriminale për të iu hakmarrë ish të dashurës e cila e mashtroi gjatë një plaçkitje në bankë.

Loja është transformuar bindshëm ashtu që mund të ndjeni përvojë gati të njëjtë me atë të para 10 viteve. Mirëpo, ka edhe ndryshime duke pasur parasysh se sistemi i kontrollit i është adaptuar ekranit të ndjeshëm në prekje ndërsa grafika ka kaluar nëpër HD remont për mundësitë e iPhoneit dhe iPadit.

Loja është lëshuar në shtije edhe për pajisjet e caktuara me Android – HTC Rezound, Motorola Droid X2 dhe Atrix 4G, si dhe për Motorola Xoom, Samsung Galaxy Tab dhe Asus Eee Pad Transformer.

GTA III për iPhone dhe iPad kushton 4.99 dollarë në SHBA dhe 2.99 funt në Britani të Madhe. /Telegrafi/