Nënshkruhet protokolli i bashkëpunimit kulturor

Në oborrin e Galerisë Kombëtare të Shqipërisë, ministrja e Kulturës së Shqipërisë, Mirela Kumbaro – Furxhi, bashkë me stafin e saj në përbërje prej 15 anëtarë, kishin dalë për të pritur delegacionin e Kosovës të përbërë nga 20 përfaqësues të institucioneve kulturore të Kosovës dhe zyrtarë të MKRS, duke shënuar kështu takimin e parë mes institucioneve të kulturës dhe artit të Republikës së Kosovës dhe Republikës së Shqipërisë.

“Kultura, hapësira jonë e përbashkët” ka pasur si titull tema e diskutimit ndërministror në takimin e paraparë të nisë në orën 11 të paradites, ka nisur me një orë vonesë.

E para ka marrë fjalën ministrja Kumbaro, me ç’rast u ka uruar mirëseardhje delegacionit nga Kosova. Ajo tha se kapërcimi i kufirit gjeografik dhe kulturor, bëhet i mundur vetëm nëse arrijmë t’i zhvendosim kufijtë tonë të brendshëm. Kumbaro-Furxhi tha se ky takim i përbashkët nuk është vetëm për deklarata, por për një projekt të përbashkët kulturor.

“Projektin tonë të përbashkët unë e ndjej si një qarkullim të vlerave të përbashkëta, shkëmbimin e përvojave në menaxhimin e institucioneve të artit, për përafrimin e ligjeve në kulturë, krijimin e itinerareve të përbashkëta në trashëgimi duke qenë e ndërgjegjshme se kjo listë është jo shteruese, të cilën unë ju ftoj ta plotësojmë sot së bashku, jo me propagandë, por me aksione”, ka thënë ministrja Kumbaro.

Ndërkaq i pari i kulturës në Kosovë, Memli Krasniqi, ka nisur fjalën e tij me ftesën për festën e 6-vjetorit të pavarësisë së Kosovës, duke thënë se pikërisht këtë përvjetor do ta hapin me shënimin e hapit më të rëndësishëm të bashkëpunimit kulturor ndërmjet Kosovës dhe Shqipërisë.

“Ky takim i sotshëm, padyshim që shënon një etapë të re për dy vendet tona dhe në përgjithësi për kombin tonë. Është e një rëndësie të veçantë për bashkëpunimin tonë kulturor, ku ka një angazhim special të dy kryeministrave tonë. Mbledhja e përbashkët e dy qeverive tona ka qenë një hap historik, nga i cili takim po konkretizohen edhe hapat në fushat e ndryshme të bashkëpunimit, në rastin e sotshëm edhe në kulturë”, ka thënë ministri Krasniqi.

Pas fjalës së dy të parëve të kulturës të Kosovës dhe të Shqipërisë, në tryezën “Kultura, hapësira jonë e përbashkët”, planet e tyre i kanë shpaluar edhe zyrtarët e institucioneve të të dyja shteteve, të cilët kanë informuar njëri tjetrin për punët që ndodhin në këto institucione, por larg mediave. Krerët e institucioneve të Kosovës bashkë me homologët e tyre kanë vizituar institucionet kulturore të Shqipërisë. Gjatë këtij ministri i Kulturës, Memli Krasniqi ka vizituar edhe varrin e artistes që ndërroi jetë pak ditë më parë, Vaçe Zelës.

Në orët e pasdites ndërkaq në ambientet e Ministrisë së Kulturës është nënshkruar protokolli i bashkëpunimit kulturor i të dy shteteve.

Protokolli i Bashkëpunimit është në vijim të zotimit të dy qeverive për “Kalendarin e përbashkët kulturor” për katër vjet. Protokolli parashikon detyrim konkret për krijimin e kalendarëve të përbashkët kulturor çdo vit, si aneks të tij. Ai nis menjëherë që në ditën e sotme me datën 14 shkurt:

– Ekspozita e Fototekës “Marubi” në bashkëpunim me Galerinë e Arteve të Prishtinës: “Objekti i lëvizshëm i një arkivi”- 14 shkurt, 2014 në Prishtinë.

– Shfaqja për fëmijë “Princesha Teuta” dhe Këngë e valle popullore dhe poezi të Qendrës Kombëtare Fëmijëve, Tiranë do të jetë në Prizren, më 17 shkurt 2014

– Në kuadër të përvjetorëve të pavarësisë së Kosovës dhe Shqipërisë, respektivisht në shkurt dhe nëntor, do të organizohen shfaqje filmash në Prishtinë dhe Tiranë, të arkivit të filmit.

– Botohet vepra e plotë e Jeronim De Radës-shoqëruar me aktivitetin promovuese në Kozencë, Tiranë dhe Prishtinë

– Do të botohet antologji e poezisë shqipe të shekullit XX, mbështetur nga të dy ministritë

– Shpallim sot angazhimin e përbashkët për mbështetjen e Festivalit të Gjirokastrës në vitin 2015.

– Në vijim të angazhimit të dy qeverive, edhe “Doku Festi” është pjesë e këtij kalendari.

– Në muajin mars për herë të parë vjen në Tiranë Trupa e Baletit dhe solistet e Teatrit të baletit të Prishtinës me shfaqjen “Dashuria që vret”.

– Gjithashtu nga Prishtina vjen shfaqja “Ballo e Diplomës”

– Angazhim konkret për përfshirjen e artistëve nga Kosova në projekte të TKOB në Tiranë

– Kalendari kulturor përfshin hapësirë të përbashkët për filmin në festivalet prestigjioze si Berlinale dhe Kanë, viti 2015

– Në muajin shtator Qendra Kombëtare e Fëmijëve do të organizojë shfaqjen në Prishtinë dhe në Tiranë “Dy trëndafila një kurorë”.

– Në artin pamor në Tiranë do të organizohet ekspozitë e Simon Shirokës.

– Në Prishtinë një ekspozitë e Realizmit Socialist.

– Konferencë vjetore një herë në Prishtinë dhe një herë në Tiranë për trashëgiminë kulturore materiale dhe jomateriale me tematika specifike.

– Trajnime të përbashkëta nga specialistët e UNESCO-s dhe organizata të tjera.

– Trajnime nga stafi i Bibliotekës Kombëtare në Tiranë për specialistët në Prishtinë.

– Pjesëmarrje e përfaqësuesve nga Kosova në aktivitetet e Agjencisë të Shërbimit Arkeologjik

– Premierë e përbashkët dhe produksion koreografik të ansamblit të këngëve dhe valleve popullore dhe ansamblit Shota ”Pazari i Korçës dhe Prizrenit”.

– Më së paku shfaqja e një premiere në Tiranë dhe Prishtinë e Teatrove Kombëtarë.

– Konferenca për dramaturgjinë në Tiranë

/Zëri/