Organizohet BarCamp Prizren #12

Edicioni i dymbëdhjetë i BarCamp Prizren do të mbahet këtë të Enjte, më 19/06/2014 prej orës 20:00 në Afi Park (Parku afer Lidhjes Shqiptare të Prizrenit) organizohet nga OJQ THY ndërsa mbështetet nga Fondacioni IPKO. BarCamp Prizren është një ngjarje joformale që përkrahet nga komuniteti dhe në mes tjerash i jep shumë rëndësi debatit interaktiv ndërmjet folësit dhe pjesëmarrësve.

Ashtu si në të kaluarën, edhe kësaj rradhe të pranishmit do të kenë mundësinë të ndjekin prezantimet interesante, si dhe ju inkurajojmë të merrni pjesë në diskutime interaktive.

Tahir Hoxha, zhvillues i web aplikacioneve si dhe trajnues i afirmuar në fushën e web dizajnit dhe programimit, do të flet rreth trendeve botërore të tregtisë elektronike dhe pozitës së bizneseve të vogla dhe të mesme të Kosovës në këtë kontekst. Sa jemi të gatshëm të përfshihemi në tregtinë elektronike globale, çfare mund të përfitojmë dhe cilat janë pengesat që duhet eliminuar. Si shembull do të prezantohet një firmë e pronarit kosovar që operon me sukses në tregun e Zvicrës.

Dren Shporta ka studiuar kompjuterikën dhe telekomunikacionin në Universitetin e Prishtinës derisa në kohë të lirë është marrë me media duke punuar në radio dhe gazeta të ndryshme kosovare gjatë periudhës 2002-2010. Si adhurues i sportit dhe mungesës së një faqeje të mirëfilltë sportive në Kosovë, një shokë e shtyu që t’ia nis projektin sportiv Borozani.com; Borozani.com tashmë është duke e jetuar vitin e tretë të punës – dhe Dreni do të na shpjegojë diçka më shumë për të.

Valmir Hazeri lindi në Prizren 5 ditë pas Karabashit, më 10.05.1988. Shkollën e mesme e përfundoi në 2008, më pas u angazhua plotësisht në mësime online. Valmiri është autodidakt në web programim dhe Search Engine Optimisation dhe entuziast i përkushtuar në dizajn dhe teknologji. Në projektet e tij profesionale hyn dhe puna si programer duke i ndihmuar kështu projektit për krijimin e një muzeu në shenjë perkujtimi për viktimat e luftes 1999 “Shtëpia-Muze të Nena Ferdonije Qerkezi”. Themeloi FletPune.com me 01/07/2011, e cila do të jetë dhe tema për të cilën ai do te flet.
Për të gjithë ata që vijnë me kohë do të ketë pije falas. Mbështetës medial janë: Telegrafi.com, Digjitale.com dhe Gazeta Ora.com. Ngjarja mund të përcillet edhe në rrjetet sociale, ku veçanërisht në twitter mund të kërkoni më shumë me hashtag #BCPrizren